काठमाडौं- पूर्वराजा ज्ञानेन्द्र शाहको आइतबारको भक्तपुर भ्रमणप्रति राप्रपा वरिष्ठ उपाध्यक्ष रवीन्द्र मिश्रले खुशी व्यक्त गरेका छन्।
उनले केहीबेरअघि सामाजिक सञ्जालमार्फत ज्ञानेन्द्रको भक्तपुर भ्रमण क्रममा एकत्रित भएका समर्थकको तस्बिर राख्दै खुशी व्यक्त गरेका हुन्। भक्तपुरपछि पाटन र काठमाडौंमा पनि पूर्वराजाप्रति जनसमर्थन उर्लिने दाबी गरेका छन्।
‘अब मलाई गाली गरेरै बस्नोस् ! तर वास्तविकता त देशभरि यही हो,’ मिश्रले लेखेका छन्, ‘गणतन्त्रवादी नेमकिपाको दशकौंदेखिको बलियो पकड भएको भक्तपुर उर्लियो। त्यसैले भक्तपुरको आजको राजा ज्ञानेन्द्रको यात्रा अत्यन्तै अर्थपूर्ण छ।’
‘अब पाटन र काठमाडौं उर्लिएपछि ’प्रचण्ड पथगामी’हरूले नेपाल र यो क्षेत्रकै दीर्घकालीन शान्ति, स्थिरता तथा नेपालको सार्वभौमसत्ता, भौगोलिक अखण्डता र अन्तर्राष्ट्रिय स्वाभिमानका लागि राजा, राजनीतिक दल र जनताबीच नवीन समझदारीलाई रोक्न सक्ने छैनन्,’ मिश्रले लेखेका छन्, ‘प्रमुख राजनीतिक दलहरू शान्तिपूर्ण संक्रमणका लागि जति छिटो तयार भयो, त्यति राम्रो हुनेछ।’