गोदावरी (कैलाली)- सुदूरपश्चिम प्रदेशका मुख्यमन्त्री कमलबहादुर शाहले सेती प्रादेशिक अस्पतालमा चिकित्सकसहित अन्य स्वास्थ्यकर्मी र भौतिक संरचनाको अभावलाई चाँडै पूर्ति गर्न प्रदेश सरकार लागिपरेको बताउनुभएको छ ।
आज सेती प्रादेशिक अस्पतालको अनुगमन गर्दै उहाँले अस्पतालले प्रदान गर्दै आएको सेवा प्रवाहलाई तीन महिनाभित्र देखिने गरी परिवर्तन ल्याउने बताउनुभयो । मुख्यमन्त्री शाहले अस्पतालले प्रदान गर्दै आएको सेवा प्रवाह र व्यवस्थापकीय समस्या देखिएकाले तीन महिनाभित्र आवश्यक जनशक्तिसहित भौतिक पूर्वाधारमा सुधार ल्याउन प्रदेश सरकार अघि बढेको बताउनुभयो ।
उहाँले बजेट अभावमा धेरै सेवा सुविधा थप्न नसकिने अवस्था भए पनि अस्पतालको स्तरोन्नति गरिने बताउनुभयो । मुख्यमन्त्री शाहले अस्पतालले प्रदान गर्दै आएको सेवा प्रवाहका बारेमा जनगुनासाहरू बाहिर आइरहेकाले ती गुनासा सम्बोधन गर्न चिकित्सक तथा स्वास्थ्यकर्मी पनि जिम्मेवार हुनुपर्ने बताउनुभयो ।
मुख्यमन्त्री शाहले कर्मचारीको समस्यालाई सङ्गठन तथा व्यवस्थापन सर्वेक्षण (ओएण्डएम) गरेर समाधान गर्ने बताउनुभयो । अनुगमनमा भौतिक पूर्वाधार विकासमन्त्री प्रकाशबहादुर देउवा, सामाजिक विकासमन्त्री झपटबहादुर साउद पनि सहभागी हुनुहुन्थ्यो ।
अनुगमनमा पुग्नुभएका मुख्यमन्त्रीसहित मन्त्रीलाई अस्पताल सञ्चालक समितिका अध्यक्ष निर्मल शाहले अस्पतालमा चिकित्सकसहित अन्य स्वास्थ्यकर्मी र भौतिक संरचनाको अभाव रहेको जानकारी दिनुभएको थियो ।