काठमाडाैं– २०७६ सालमा एक कार्यक्रममा भाग लिने बहानामा अमेरिका पुगेर उतै लुकेकी कालीकोटको तिलागुफा नगरपालिकाकी तत्कालीन उपमेयर दन्ता नेपालीले प्रधानमन्त्री पुष्पकमल दाहाल प्रचण्डसँगको तस्वीर सार्वजनिक गरेकी छन्।

२०७४ सालको स्थानीय तहको निर्वाचनमा उनी नेकपा माओवादी केन्द्रबाट उपमेयरमा विजयी भएकी थिइन्। २०७६ कात्तिकको पहिलो साता एक कार्यक्रममा भाग लिन अमेरिका उडेकी उपप्रमुख दन्ता सम्पर्कविहिन भएकी थिइन्।

दन्ताले सोमबार संयुक्त राष्ट्रसंघको ७८औँ महासभामा भाग लिन अमेरिका पुगेका प्रधानमन्त्री प्रचण्डसँग खिचेको तस्वीर फेसबुकमार्फत सार्वजनिक गरेकी हुन्।

‘सम्माननीय प्रधानमन्त्रीज्यूलाई अमेरिकामा हार्दिक स्वागत छ। संयुक्त राष्ट्र संघको ७८औँ महासभामा भाग लिन नेपाली प्रतिनिधिमण्डलको नेतृत्व गर्दै न्युयोर्क प्रस्थान गर्नु भएको छ। सम्माननीय प्रधानमन्त्रीज्यू तथा भ्रमण दलका सबै सदस्यहरुलाई भ्रमण सफलताको हार्दिक शुभकामना व्यक्त गर्दछौँ। अमेरिकामा हार्दिक स्वागत। अमेरिकाको बसाइँ सुखद रहोस्, हार्दिक शुभकामना।,’ उनले तस्वीर राख्दै लेखेकी छिन्।

अमेरिका पुगेर लुकेकाे आरोप लागेपछि उनले आफू बिरामी भएर नेपाल फर्किन नसकेको र उपचार सकेर पाँच महिनापछि सके नेपाल फर्किने, नसके एतै मर्ने भन्दै फेसबुकमा स्टाटस लेखेकी थिइन्। तर, चार वर्ष भइसक्याे न उनी नेपाल आइन, न त उनलाई उनले भनेजस्ताे बिरामी भएकी थिइन्।