काठमाडौं- मोहम्मद सिराजको उत्कृष्ट खेल प्रदर्शनप्रेरित भारतले एसीसी एसिया कपको फाइनलमा श्रीलंकालाई ५० रनमै समेटिन बाध्य बनाएको छ। टस जितेर ब्याटिङ रोजेको श्रीलंकाले खराब प्रदर्शन गर्दै १५.२ ओभरमा अल आउट हुँदै मात्र ५० रन बनाएको हो।

तीव्र गतिका बलर सिराज र हार्दिक पाण्ड्या चम्किएपछि श्रीलंका सस्तैमा समेटिएको छ। सात ओभर बलिङ गरेका सिराजले २१ रन खर्चिएर ६ विकेट लिए। पाण्ड्याले २.२ ओभरमा तीन रन खर्चिँदै तीन विकेट लिए।

ब्याटिङतर्फ घरेलु टोलीका कुनै पनि खेलाडीले राम्रो प्रदर्शन गर्न सकेनन्। कुशल मेन्डिसले सर्वाधिक १७ रन बनाए। दुसान हेमन्था १३ रनमा अविजित रहे।

सिराजले चौथो ओभरमा चार विकेट लिएपछि भारत उत्कृष्ट लयमा देखिएको थियो। कोलम्बोस्थित आर प्रेमादासा क्रिकेट रंगशालामा श्रीलंकाले चौथो ओभरमा पथुम निसन्का, सदिरा समाराविक्रम, चरिथा असलंका र धनञ्जय डि सिल्भालाई गुमाएको थियो।

मोहम्मद सिराजले ओभरको पहिलो बलमा निसन्कालाई व्यक्तिगत दुई रनमा रविन्द्र जडेजाबाट क्याच गराएका थिए। तेस्रो बलमा सामाराविक्रमा एलबीडब्लू हुन पुगे। चौथो बलमा असलंका इशान किसनबाट क्याच आउट भएका थिए। ओभरको अन्तिम बलमा डी सिल्भा व्यक्तिगत चार रन बनाउँदा विकेट किपर केएल राहुलबाट क्याच भए।

यसअघि पहिलो ओभरको तेस्रो बलमा जस्प्रित बुमराहले कुशल परेरालाई राहुलबाट क्याच गराएका थिए। भारत आठौं पटक एसिया कपको उपाधि जित्ने तयारीमा छ।