काठमाडौं- मोरङ जहदा गाउँपालिका-३ जयरामपुरस्थित ससुराली घरमा बस्दै आएका ४० वर्षीय अशोक रिसिदेव कटहरी गाउँपालिका-३ स्थित नहरको पानीमा आइतबार मृत अवस्थामा फेला परेका छन् । विराटनगर महानगरपालिका-१९ घर भएका अशोकको उक्त नहरको पानीमा डुबेको अवस्थामा शव फेला परेको हो ।
ओखलढुङ्गा खिजिदेम्बा गाउँपालिका-९ छाप्रे बस्ने ३१ वर्षीय गणेश विक घरबाट ३ किलोमिटर टाढा मोलुङखोलाको पानीमा आइतबार मृत अवस्थामा फेला परेका छन् । यहि माघ १ गतेदेखि हराएर बेपत्ता भएका उनको खोजी गर्नेक्रममा उक्त खोलामा शव फेला परेको हो ।
काभ्रे धुलिखेल नगरपालिका-११ कल्छेबेशीस्थित राम प्रसाद हुमागाईको घरमा पेन्टिङको काम गरी बस्ने सर्लाही ईश्वरपुर नगरपालिका-८ घर भएका २९ वर्षीय बसन्त कार्की सुतेकै ठाउँमा आइतबार मृत अवस्थामा फेला परेका छन् ।
कास्की पोखरा महानगरपालिका-१७ मानव सेवा आश्रममा बस्ने मादी गाउँपालिका-९ मिजुरे डाँडा घर बताउने ६८ वर्षीया भुमाया परियार आफू सुत्ने ओछ्यानमा आइतबार मृत अवस्थामा फेला परेकी छन् ।
पाँचथर फिदिम नगरपालिका-१ कात्तिके बस्ने ५० वर्षीय लाइन बहादुर राई सोही नगरपालिका नाम्दुखोलास्थित बाटोबाट करिब २ सय मिटर तल आइतबार मृत अवस्थामा फेला परेका छन् । नाम्दुखोलामा ढुङ्गा फुटाउन जान्छु भनी गएकोमा फर्कि नआएपछि खोजी गर्नेक्रममा उक्त स्थानमा लडेर मृत्यु भएको अवस्थामा उनको शव फेला परेको हो ।
बैतडी पाटन नगरपालिका-३ र ६ को सिमानास्थित सूर्नया नदीको किनारमा हाल नाम, थर, वतन नखुलेका करिब २६ वर्षीय पुरुष आइतबार मृत अवस्थामा फेला परेका छन् ।