काठमाडौं – ओखलढुङ्गा सिद्धिचरण नगरपालिका-३ असिनेस्थित सडकमा को.१ ज ३५६९ नम्बरको बोलेरो गाडीलाई सडकमाथिबाट खसेको ढुङ्गाले आइतबार बिहान थिच्दा गाडीमा सवार ३ जनाको मृत्यु भएको छ । मृत्यु हुनेहरूमा सोही ठाउँ बस्ने १० वर्षीय युसब कोईराला, ७ वर्षीया युनिसा कोईराला र मानेभञ्याङ गाउँपालिका-१ मोली बस्ने ३० वर्षीय हेम बहादुर मगर रहेका छन् । सडक माथिबाट जेसिबिले ढुङ्गा निकाल्नेक्रममा ढुंगा खसेर किची दुर्घटना भएको भन्ने खबर प्राप्त हुनासाथ जिल्ला प्रहरी कार्यालय ओखलढुङ्गाबाट खटिएको प्रहरीले गाडीमा सवार चालक सहित ६ जनाको उद्धार गरी सामुदायिक अस्पताल मिसन पठाएको ३ जनाको बाटोमै मृत्यु भएको हो । चालक समेत २ जनालाई थप उपचारको लागि प्रभु एयरको हेलिकप्टरद्वारा काठमाडौं बासबारीस्थित न्यूरो अस्पताल पठाईएको छ । फरार रहेका जेसिबी चालकको प्रहरीले खोजी गरिरहेको छ ।
सिन्धुली कमलामाई नगरपालिका-१ बलौटास्थित सडकमा प्र.२-०२-००१ ह १८२७ नम्बरको अटो आफैँ अनियन्त्रित भई नालामा खसेर आइतबार विहान दुर्घटना हुँदा अटोमा सवार सोही ठाउँ बस्ने बिष्णु परियारको घटनास्थलमै मृत्यु भएको छ । साथै दुर्घटनामा घाइते भएका अन्य २ जनाको जिल्ला अस्पताल सिन्धुलीमा उपचार भइरहेको छ । अटो चालकलाई प्रहरीले नियन्त्रणमा लिएको छ ।
यसैगरी सिन्धुली कमलामाई नगरपालिका-२ पौवागढीस्थित सडकमा बा.९६ प ६७४० नम्बरको मोटरसाइकल आफैँ अनियन्त्रित भई सडकबाट करिब २५ फिट तल खसेर आइतबार बिहान दुर्घटना हुँदा मोटरसाइकल चालक उदयपुर त्रियुगा नगरपालिका-७ बस्ने २८ वर्षीय मान बहादुर खत्रीको मृत्यु भएको छ । दुर्घटनामा गम्भीर घाइते भएका उनको जिल्ला अस्पताल सिन्धुलीमा उपचारको क्रममा मृत्यु भएको हो ।