काठमाडौ– अल्वानिया पठाइदिन्छु भन्दै रकम ठगी गरेको अभियोगमा प्रहरीले एक युवतीलाई पक्राउ गरेकाे छ।
काठमाडौं महानगरपालिका-९ सिनामंगल बस्ने झापा बिर्तामोड नगरपालिका-४ घर भएकी २५ वर्षीया सुधा चौधरीलाई सोमबार राति प्रहरीले पक्राउ गरेको हाे।
वैदेशिक रोजगारमा अल्वानिया जान ८ लाख रुपैयाँ लाग्ने र त्यहाँ पुगेपछि प्याकिङकाे काममा मासिक ७२ हजार रूपैयाँ भन्दा बढी तलब हुने काम लगाइदिन्छु भन्दै प्रलोभनमा पारी उनले पीडितबाट रकम उठाएकाे प्रहरीले बताएकाे छ।
पटकपटक गरी २ लाख ७२ हजार रूपैयाँ लिई सम्पर्क बिहीन भएपछि ठगी आराेपमा पक्राउ गरी उपस्थित गराउन वैदेशिक रोजगार विभागबाट पत्राचार भएपछि काठमाडौं उपत्यका अपराध अनुसन्धान कार्यालय मिनभवनबाट खटिएको प्रहरीले उनलाई पक्राउ गरेको हो।
उनलाई थप अनुसन्धान तथा कारवाहीका लागि वैदेशिक रोजगार विभाग ताहाचाल काठमाडौं पठाइएको प्रहरीले बताएकाे छ।