काठमाडौं– ललिता निवास प्रकरणमा नाम जाेडिएका प्रधानमन्त्रीद्वय बाबुराम भट्टराई र माधवकुमार नेपाललाई घटना विवरण कागजमात्र गराएकाे खुलेकाे छ।
नेपाल प्रहरीको केन्द्रीय अनुसन्धान ब्युरो (सिआइबी) प्रमुख किरण बज्राचार्यले उनीहरूकाे निवासमै पुगेर लिएकाे बयान बयान नभएर घटना विवरण कागज मात्र भएकाे खुलेकाे छ। बयान लिनुपर्नेसँग घटना विवरण कागज मात्र गराउनु भनेकाे उन्मुक्ति दिएसरह भएकाे स्राेतकाे दाबी छ।
घटना विवरण कागजले प्रतिवादी बनाउन नमिल्ने कानुनका जानकारले बताएका छन्। सरकारी वकिलको उपस्थितिमा बयान गराएमा मात्र प्रतिवादी बनाउन सकिने कानुनी व्यवस्था रहेकाे र घटना विवरण कागज सरकारी साक्षी बनाउन मात्र प्रयोग हुने सरकारी वकील कार्यालय स्राेतले बताएकाे हाे।
उनीहरूलाई घटना विवरण कागजमा हस्ताक्षर गराएसँगै सिआइबीले बालुवाटारस्थित ललिता निवासको सरकारी जग्गा हिनामिनासम्बन्धी अनुसन्धान पूरा गरेको बताएकाे छ।
निर्णयकर्तालाई साेधपुछसम्म नगरी कार्यान्वयन कर्तालाई मात्र दाेषी बनाइकाे भन्दै चाैतर्फी आलाेचना भएपछि सिआइबीले पूर्वप्रधानमन्त्रीद्वयसँग बयान लिएकाे भनिएकाेमा घटना विवरण कागज मात्र गराएकाे खुलेकाे हाे।
यसअघि सर्वाेच्च अदालतले पनि पूर्वप्रधानमन्त्रीकाे पनि बयान लिनसक्ने आदेश दिएर बाटाे खुला गरिदिएकाे थियाे। तर सिआइबीले उनीहरूसँग बयान पनि नलिई अनुसन्धान सकेकाे बताएकाे थियाे। तर अन्तिम समयमा सिआइबीले उनीहरूकाे घटना विवरण कागज गराएकाे छ।
सङ्गठित अपराधको कसुरमा अनुसन्धानको हदम्याद ६० दिन हुने भएकाले ८ भदौभित्र अनुसन्धान प्रतिवेदन बुझाइसक्नुपर्ने बाध्यता प्रहरीलाई छ।