काठमाडौं– काठमाडौं तराई-मधेश द्रुतमार्गको विस्तृत परियोजना प्रतिवेदन (डिपीआर) संशोधन गरिएको छ। लागत समय र लागत मूल्य घट्ने गरी द्रुतमार्गको प्रतिवेदन संशोधन गरिएको भौतिक पूर्वाधार तथा यातायातमन्त्री प्रकाश ज्वालाले बताए।
मङ्गलबार बसेको मन्त्रिपरिषद्को बैठकले काठमाडाैं-तराई-मधेश द्रुतमार्गको डिपीआर संशोधनको निर्णय गरेको हो।
झण्डै दुई अर्ब दुई करोड रुपैयाँ लागत घट्ने र निर्माणको समय पनि घट्नेगरी द्रुतमार्गको डिपीआर संशोधन भएको मन्त्री ज्वालाले बताए। “सुरुङ मार्ग थपिँदा सडकको लम्वाइ र मूल्य दुबै घट्यो” उनले भने।
काठमाडौं-मधेश ‘लाइफ लाइन’ का रुपमा रहेको द्रुतमार्ग नेपाली सेनाको व्यवस्थापनमा निर्माण भइरहेको छ। २१ वैशाख २०७४ देखि निर्माण सुरु गरिएको द्रुतमार्ग हालसम्म २५ दशमलव ५४ प्रतिशत मात्र प्रगति भएको र चैत मसान्त २०८३ सम्म सक्ने लक्ष्य लिइएको छ।
द्रुतमार्गको प्रगति कमजोर देखिएपछि मन्त्री ज्वालाले नेपाली सेनासँग असन्तुष्टी जनाए। द्रुतमार्गको काम द्रुतगतिमा हुनुपर्ने भए पनि प्रगति हेर्दा आशावादी नभएको नेपाली सेनाका अधिकारीलाई मन्त्री ज्वालाले बताएका थिए।
प्रतिवेदन संशोधन भएपछि लागत मूल्य पनि घट्ने भएको छ। दुई खर्ब १३ अर्ब नौ करोड ५३ लाखको लागत रहेकामा संशोधनपछि दुई खर्ब ११ अर्ब नौ करोड ३० लाख आयोजनाको लागत रहने भएको छ।