काठमाडौं- जल तथा मौसम विज्ञान विभागले आज ५ वटा प्रदेशमा वर्षा हुने प्रक्षेपण गरेको छ।
विभागका अनुसार कोशी, वागमती, गण्डकी, लुम्बिनी, कर्णाली र सुदूरपश्चिमका पहाडी भेगमा वर्षाको सम्भावना देखिएको छ। कोशी प्रदेशका १-२ स्थानमा भने भारी वर्षा हुने सम्भावना देखिएको छ।
कोशी, वागमती, गण्डकी र कर्णाली प्रदेशका केही स्थानमा मेघ गर्जन र चट्याङसहित हल्कादेखि मध्यम वर्षाको सम्भावना छ।
मेघ गर्जन, चट्याङ, बाढी, पहिरो, भूक्षय र गेग्रान बहाव तथा वर्षाका कारण नदीको स्तर बढेर हुन सक्ने जोखिम वा क्षतिबाट बच्न उच्च सतकर्ताका लागि विभागले आग्रह गरेको छ।
अहिले देशका पूर्वी र मध्य भेगमा मनसुनी प्रणालीको प्रभाव छ। अन्य क्षेत्रमा स्थानीय र पश्चिमी वायुको आंशिक प्रभाव छ।
आज दिउँसो कोशी प्रदेशमा सामान्य बदली रही देशका बाँकी पहाडी भेगमा आंशिकदेखि सामान्य बदली एवं तराई क्षेत्रमा आंशिक बदलीदेखि मौसम सफा रहने पूर्वानुमान छ। कोशी प्रदेशका केही, वागमती, गण्डकी र कर्णालीका थोरै र बाँकी क्षेत्रका १-२ स्थानमा मेघ गर्जन र चट्याङसहित हल्कादेखि मध्यम वर्षाको सम्भावना छ।
आज राति कोशी, लुम्बिनी र सुदूरपश्चिमलगायत देशका पहाडी भेगमा आंशिकदेखि सामान्य बदली रही बाँकी इलाकामा आंशिक बदलीदेखि मौसम सफा रहने पूर्वानुमान छ।
कोशी, लुम्बिनी, सुदूरपश्चिम, वागमती र गण्डकीका पहाडका थोरै तथा बाँकी भूभागका १-२ स्थानमा मेघ गर्जन र चट्याङसहित हल्कादेखि मध्यम वर्षाको सम्भावना छ। कोशी प्रदेशका १-२ स्थानमा भने भारी वर्षाको पनि सम्भावना देखिएको छ।