काठमाडौं– पौडी खेल्ने क्रममा डुबेर शुक्रबार एकैदिन देशभरबाट पाँच जनाकाे ज्यान गएकाे छ।
जाजरकोटकाे भेरी नगरपालिका-१३ कुदुस्थित सिचाई गर्ने सार्वजनिक पोखरीमा डुबेर सोही ठाउँका नरबहादुर बस्नेतको छोरा ९ वर्षीय सन्दिप बस्नेत र टिकाराम बस्नेतको छोरा १० वर्षीय प्रमोद बस्नेतको शुक्रबार राति मृत्यु भएको हाे।
पौडी खेल्ने क्रममा डुबेर अशक्त भएका सन्दिप बस्नेतको मिसन अस्पताल चौरजहारी रुकुम (पश्चिम)मा र प्रमोद बस्नेतको जिल्ला अस्पताल जाजरजोटमा उपचारको क्रममा मृत्यु भएको हो।
त्यस्तै नुवाकोटकाे तादी गाउँपालिका-४ ढाडेस्थित तादी खोलामा पौडी खेल्ने क्रममा डुबेर सिन्धुपाल्चोक ईन्द्रावती गाउँपालिका-८ बस्ने १८ वर्षीय अरुण श्रेष्ठको शुक्रबार दिउँसो मृत्यु भएको छ।
त्यस्तै गोरखाकाे गोरखा नगरपालिका-६ रानिपोखरीको परिसरमा रहेको पोखरीमा पौडी खेल्ने क्रममा डुबेर धार्चे गाउँपालिका-५ सिङ्ला घर भई हाल गोरखा नगरपालिका-६ ढाड गाउँ बस्ने ८ वर्षीय मनिष गुरुङको शुक्रबार दिउँसो मृत्यु भएको छ। डुबेर अशक्त भएका मनिषकाे जिल्ला अस्पताल गोरखामा उपचारको क्रममा मृत्यु भएको हो।
त्यस्तै दाङकाे लमही उपमहानगरपालिका-४ बट्का घुम्नास्थित राप्ती नदीमा नुहाउने क्रममा डुबेर सोही ठाउँका सुरेश चौधरीको छोरा १३ वर्षीय राहुल चौधरीको शुक्रबार दिउँसो मृत्यु भएको हाे।