संसदभित्रको गाली गलौज
एकअर्कालाई खुइल्याउने
तमाशा हेरेपछि
बडका भलमन्सा भन्दै थिए

हाम्रो संसद नीति नियम
बनाउने ठाउँ होइन रहेछ
देश विकासको
कुरा गर्ने ठाउँ होइन रहेछ

कुकुर बिरालोजस्तो
झगडा गर्ने ठाउँ रहेछ
एकअर्कालाई
खुइल्याउने ठाउँ रहेछ
भए गरेका बदमाशी
लुकाउने ठाउँ रहेछ
आफ्ना चाकरेलाई
जागिर खुवाउने ठाउँ रहेछ

जस्तो मान्छे पठायो
त्यस्तै कुरो गर्ने
व्यवहार त्यही देखाउने
ठाउँ रहेछ

जनताले के सोच्दा हुन्
के भन्दा हुन्
त्यो सोच्ने हुति नभएका

पैसोको कुरा आयो तैं चुप मैं चुप
आफ्नै कुलको बदमास भए
जोगाउने ठाउँ रहेछ

डाका भए डोरीले कस्नु पर्दैन
त्यस्तालाई तुरुङमा हाल्नु पर्दैन

मुर्राको नचाहिँदो बहस सुन्दा
संसदभित्र राँगा कराएजस्तै
भैंसीको आहालमा लडिबडी गरेजस्तै

हुन पनि हो हाम्रो संसद
कहिले बक्सिङको रिङजस्तै
कहिले स्ट्रिप्टिज सोजस्तै
कहिले नर्सरी विद्यालयजस्तै
इज्जत नभाको समूहजस्तै

शैक्षिक योग्यता नपुगेकालाई
जागिर खुवाउने ठाउँजस्तै
मज्जाले निदाउने ठाउँजस्तै
कुरै नबुझी हल्ला गर्ने ठाउँजस्तै

रीतिथिति बसाउने ठाउँ
बेथितिमा चलेको छ

यिनका गफ होहल्ला
सुन्ने कहिलेसम्म

यिनको बेफ्वाँकको खर्च
धान्ने कहिलेसम्म

जय होस्