झापा- झापाको बर्ने चिया बगानस्थित मेची राजमार्ग किनारमा शिरीष फूलेर राताम्य भएपछि ‘टिकटक भिडियो’ बनाउनेको भीड उर्लिएको छ।

झापा र इलामको सिमाना नजिक पर्ने सो स्थान बुद्धशान्ति गाउँपालिका-४ मा छ। चियाको बुट्यानयुक्त प्राकृतिक हरियालीमा फूलको सौन्दर्य थपिएपछि मेची राजमार्ग हुँदै पहाडी जिल्लाहरू इलाम, पाँचथर र ताप्लेजुङ जाने अधिकांश यात्री एकछिन रोकिएर रमाउने र फोटो खिच्छन्।

शिरीष फूलको सौन्दर्यले मोहित हुँदै खिचिएका फोटो र भिडियो सामाजिक सञ्जालमा भाइरल छन्। भिरालो जमिन भएकाले भूक्षय हुन नदिन शिरीषका बिरुवा हुर्काइएको थियो। पुराना ती रुखहरू वर्षमा एकचोटि फूलेर राताम्य हुँदा पर्यटकीय आकर्षणको केन्द्र बन्ने गर्छन्।

शिरीष फूल्न थालेपछि दैनिक करिब ५०० मानिस सो स्थानमा घुमफिरका लागि आउने गरेका छन्। पर्यटकको ओइरो लागेपछि चिया, खाजा र पानी बेच्ने साना व्यवसाय फस्टाएका छन्। ‘शिरीष फूलेपछि मानिसको ओइरो लाग्यो, त्यसपछि मैले पनि यहाँ पानी, कुरमुरेजस्ता सामान बेच्न थालेको छु,’ बुद्धशान्ति-४ का अर्जुन घिमिरे भन्छन्, ‘पहिला बुधबारे बजारमा दोकान चलाउँथे। अहिले यही भाइरल शिरीषको फेदमा बसेर व्यापार चलाइरहेको छु।’ शनिबार भीड उर्लिने गरेको उनले बताए।

एक साताअघि अस्ट्रेलियाको ब्रिसबेनबाट स्वदेश फर्केकी इटहरी-४ की अनुष्का कटुवाललाई इलामको पर्यटकीय स्थल श्रीअन्तु जाँदै गर्दा बर्नेको भाइरल शिरीषको फूलले लोभ्यायो। परिवारका १२ जना सदस्यसहित आएकी उनले रिजर्व गाडीलाई राजमार्ग छेउमा पार्किङ गराएर एक घण्टा फोटो र भिडियो खिचाउनमा बिताइन्।

‘चिया बगानको हरियाली हेर्दै इलामतिर जाँदै थियौं, रुखभरि रातो रङ पोतेजस्तो गरी फूलेको शिरीषका रुखहरू बाटामा लहरै उभिएका देखेपछि मनै थामिएन,’ उनले भननिन्, ‘वरिपरि चिया बगानको हरियाली, माझमा चिल्लो राजमार्ग र लहरै फूलको शिरीषहरू। साह्रै राम्रो ठाउँ रहेछ।’

उनले राताम्य फूललाई पृष्ठभूमिमा राखेर १२ वटा टिकटक र मनलाग्दी सेल्फी खिचिन्। अस्ट्रेलियातिर सार्वजनिक पार्कहरूमा शिरीषका रंगीबिरंगी फूलले पर्यटकलाई लठ्याउने गरेको देखेको बताउनको गुनासो छ- यति धेरै मानिसको भीड लागे ता पार्किङ, शौचालय र गफिने चौतारोहरूको अभाव छ।

भोजपुरको अरुण गाउँपालिका-४ घर बताउने ३० वर्षीय अर्पण राईले पाँचथरको फालेलुङ जाँदै गर्दा भाइरल शिरीषको फूलमा केही भिडियो बनाउन पाउँदा आनन्द लागेको बताए। फूलको फेदमा गिटार रेटेर गीत गाउँदै गरेको सात वटा भिडियो खिचेको उनले बताए।

‘फूल त एउटा सिजनमा मात्र फुल्छ। तर, यहाँ चिया बगानको सदाबहार हरियाली रहेकाले दीगो पर्यटकीय आकर्षणको केन्द्र बन्न सक्ने सम्भावना देखिन्छ,’ उनले भने। गर्मीयाममा शिरीषको बोटमुनि शीतल पाइने र त्यसमाथि फूलको सौन्दर्यले मानिसको ओइरो लाग्नु स्वाभाविक भएको उनको भनाइ छ।

के पाका, के युवा तथा बालबालिका, सबै उमेरका पाहुना त्यहाँ पुग्ने गरेका छन्। इटहरीका ६३ वर्षीय बलराम कटुवाल छोरीछोरीको आग्रहमा भाइरल शिरीषको बोटमुनि टिकटकका लागि छमछमी नाचिरहेका भेटिए। ‘छोरीहरूले कर गरेपछि नजानी नजानी पनि नाचेको हुँ। तर, यो ठाउँचाहीं साह्रै मज्जाको रहेछ,’ उनले भने।

भाइरल शिरीषको चर्चा सामाजिक सञ्जालमार्फत फैलिएपछि टिकटक बनाउनकै लागि भनेर साथीहरूसँग घुम्न आएको भद्रपुर-३ की रेबिका थापाले बताइन्। चन्द्रगढीको वीरेन्द्र नमूना क्याम्पसको शिक्षा संकायको स्नातक प्रथम वर्षमा अध्ययनरत उनले धेरैजसो साथीहरू शिरीषको फूलसँग फोटो र भिडियो खिचाउन यसअघि नै आइसकेको बताइन्।

झापामा पर्यटकीय आकर्षणका स्थलहरू प्रशस्त रहेको र फूलको सौन्दर्यले मानिसको मनलाई उल्लासित बनाउने भएकाले फूलेका शिरीषका रुखहरू भाइरल भएको फोटो पत्रकार देवेन्द्र खरेल बताउँछन्। ‘यो ठाउँ राजमार्गबाट नजिक र हरियाली चियाका बोटहरूले घेरिएको कारण धेरैको रोजाइमा परेको हो,’ उनी भन्छन्, ‘फूल फूलेरै सुन्दर बनेका यस्तै दर्जनौं स्थल हाम्रै वरपर छन्।’ सामाजिक सञ्जालमा पोस्टिएका तस्बिर र भिडियोका कारण टाढादेखि आन्तरिक पर्यटक आकर्षित बनेका छन्।

ठाउँ सुन्दर र फूल झन् सुन्दर भएरै त्यहाँ शिरीषको फूल हेर्न पर्यटकहरूको ओहोरदोहोर बढ्दो छ। छोटो अवधिमै नयाँ पर्यटकीय गन्तव्यस्थलका रूपमा विकसित बनेको त्यस ठाउँमा राजमार्गतिर उभिएर आफ्नै धुनमा फोटो र भिडियो खिच्ने प्रवृत्ति बढ्दा सडकमा दुर्घटनाको जोखिम पनि उत्तिकै बढेको छ। अर्कातिर, पर्यटकको सुविधा र सहजताका लागि शौचालय, खाजाघर र सुरक्षाको पर्याप्त प्रबन्ध हुन सकेको छैन।