विराटनगर– नेकपा माओवादी केन्द्रले कोशी प्रदेश सरकारलाई दिएको समर्थन फिर्ता लिएकाे छ।
कोशी प्रदेश संसदीय दलका नेता इन्द्रबहादुर आङ्वाेले हिक्मतकुमार कार्की नेतृत्वको सरकारलाई दिएको समर्थन आजैबाट फिर्ता लिएकाे जानकारी दिएका छन्।
विराटनगरमा बिहान कोशी प्रदेश संसदीय दल र माओवादी केन्द्र प्रदेश कार्यालय (पदाधिकारी)को बैठकले एमालेका हिक्मतकुमार कार्की नेतृत्वको सरकारलाई दिएको समर्थन आजै फिर्ता लिने निर्णय गरेको थियाे।
यस्तै बैठकले आजै कोशी प्रदेश सरकारमा रहेका मन्त्रीहरूलाई फिर्ता बोलाउने समेत निर्णय गरेकाे र मन्त्रीहरुलाई राजीनामा बुझाउन निर्देशन पनि दिएकाे थियाे।
कोशी सरकारमा माओवादी केन्द्रका दुर्गा चापागाईँ भौतिक पूर्वाधार र जीवन आचार्य पर्यटन वन तथा वातावरण मन्त्री थिए।
प्रदेश कार्यालयको बैठकले पार्टी प्रदेश अध्यक्ष हर्कबहादुर नेम्वाङ मिक्सोको नेतृत्वमा सरकार गठनका लागि छलफल गर्न समिति बनाउने निर्णय समेत गरेको छ।
