ओन्टारियो- क्यानाडामा १७ लाख ९२ हजार आप्रवासीका आवेदनमाथि निर्णय प्रक्रिया टुंगिन बाँकी देखिएको छ। इमिग्रेसन, रिफ्युजीज एण्ड सिटिजनशीप क्यानाडा (आइआरसीसी) ले त्यति आवेदनमाथि प्रक्रिया टुंगो लगाउन बाँकी रहेको देखिएको हो।

२०२१ अक्टोबर २७ सम्मको तथ्यांकअनुसार आप्रवासीका विभिन्न कार्यक्रमअन्तर्गत दिइएका आवेदनको प्रक्रिया सम्पन्न हुन बाँकी छ। इकोनोमिक, फेमिली, रिफ्युजी र ह्युमनिटरियन क्लास अन्तर्गतका ५ लाख ४८ हजार आवेदन क्यानाडामा स्थायी बसोबासका लागि प्रक्रियामा छन्।

यसैगरी स्टडी पर्मिट, वर्क पर्मिट, टेम्पोररी रेसिडेन्ट भिसा र भिजिटर एक्स्टेन्सन अन्तर्गत ७ लाख ७६ हजार अस्थायी बसोबासका लागि दिइएका आवेदन रहेको जनाइएको छ। यस्तै अक्टोबर २६ सम्मको तथ्यांकअनुसार क्यानेडीयन नागरिकताका लागि दिइएका आवेदनको संख्या ४ लाख ६८ हजार रहेको आइआरसीसीले जनाएको छ।

सबै कार्यक्रमअन्तर्गत गरी कूल १७ लाख ९२ हजार आवेदन प्रक्रियामा रहेको जनाइएको छ। जुलाइयता करिब ३ लाख ५० हजार आवेदन बढेको आइआरसीसीको भनाइ छ। अगस्टमा प्रकाशित एउटा रिपोर्ट अनुसार क्यानाडामा स्थायी बसोबासका लागि परेका आवेदनको संख्या ३ लाख ७५ हजार छ।

यो २०२१ जुलाइ ६ सम्मको तथ्यांक हो। यस्तै अस्थायी बसोबासका लागि दिइएका आवेदनको संख्या ७ लाख ३ हजार रहेको छ। क्यानाडाको नागरिकताका लागि उक्त अवधिमा ३ लाख ७० हजार आवेदन परेको तथ्यांक छ। ती सबै आवेदनहरु आइआरसीसीको अध्ययन प्रक्रियामा छन्। कोभिड-१९ महामारीका कारण लगाइएको यात्रा प्रतिबन्धलगायत विभिन्न कारणले प्रक्रिया टुंगिन बाँकी आवेदनहरुको संख्या धेरै भएको जनाइएको छ।

सकेसम्म बढीभन्दा बढी आवेदनको प्रक्रिया चाँडै टुंगो लगाउने योजना भए पनि विशेष परिस्थितिका कारण विलम्ब भएको आइआरसीसीका प्रवक्ताले यहाँका सञ्चार माध्यमलाई जानकारी दिएका छन्। अबका दिनमा सक्दो चाँडो प्रक्रिया टुंग्याएर धेरैभन्दा धेरै आप्रवासीलाई क्यानाडामा स्वागत गर्ने योजना रहेको प्रवक्ताको भनाइ छ। महामारीका बेला आइआरसीसीले प्रक्रिया टुंग्याएका आवेदनको संख्या पनि सार्वजनिक गरिएको छ।

जसअनुसार २०२१ जनवरीदेखि सेप्टेम्बरसम्म स्थायी बसोबासका लागि दिइएका ३ लाख ३७ हजार आवेदनको प्रक्रिया टुंगो लगाइएको थियो।यसअघि २०२० मा करिब २ लाख १४ हजार आवेदनको टुंगो लागेको थियो।

यस्तै अस्थायी बसोबासका लागि दिइएका १५ लाख आवेदनको प्रक्रिया २०२१ जनवरीदेखि सेप्टेम्बरसम्म टुंग्याइएको थियो। २०२० मा त्यस्ता १७ लाख आवेदनको प्रक्रिया टुंगो लागेको थियो।क्यानाडाको नागरिकता लिनका लागि दिइएकामध्ये जनवरीदेखि सेप्टेम्बरसम्म १ लाख ३४ हजार आवेदनको टुंगो लागेको जनाइएको छ। २०२० मा नागरिकताका करिब ८० हजार आवेदनमा टुंगो लागेको थियो।