यी बेइमान छन् बेशरम छन्
यिनलाई घुस खान, लुट्न
कुनै शनिबार आइतबार चाहिन्न
ऐनको बर्खिलाफ जान
कुनै साइत चाहिन्न

एक पटक सार्वजनिक ऐनामा
आफ्नो अनुहार हेर त
रगत लतपतिएको मुख
दिसा पोतिएको अनुहार
हेर्दै घिन लाग्ने
छि छि

लाज छैन है एउटा अपराधको
अर्थी उठेको छैन
अर्को अपराध गर्न भ्याई
सक्यौ है तिमीहरूले

केको लाज
केको शरम
हत्या हिंसामा रमाउने
भ्रष्टाचार, लुटपाटमा रमाउने
गफकै भरमा राजनीति गर्नेहरूलाई

संसदमा या बाहिर
भ्रष्टाचारको कुरा उठ्यो कि
तीन टाउको बस्यो मिलायो
कहिले त होला हिसाब किताब
कहिले होला न्याय निसाफ

फेरि यस्तालाई
भोट दिई
जिताउने नालायक हामी
सत्ताको चाबी दिने नकारा
पनि हामी नै

देश बनाउँछौं
भनेर राजनीतिमा आएका
नयाँ पुस्ताको चाला हेर त
सामाजिक सञ्जालमा लेख्न र
टिकटकमा बोल्नेबाहेक
फुर्सत भए पो

कुनै हुत्ती नभएका
फलको आश कुरेर बस्ने
बेइमान नेताका चाकरे होउ
युवा नेता भनाउँदा तिमीहरू

आँट छ भने
खुलेर विरोध गर
यस्ता बेइमान भ्रष्टहरूलाई
डाँडा कटाऊ

खै त घण्टीको स्वर
घण्टी भारी भयो कि
घण्टी बिग्रेर बज्नै छाड्यो
कतै मालवाला मन्त्रालय दिने भनेर
कसम त ख्वाएका छैनन्

चुप लागे राष्ट्रले जनताले सराप्ने छन्
विरोधको बिगुल बजाउने आँट गर
जनताले साथ दिने छन्