काठमाडौं- आगामी २४ घण्टामा देशका चारवटा प्रदेशमा मेघ गर्जन र चट्याङसहित हल्कादेखि मध्यम वर्षाको सम्भावना रहेको जल तथा मौसम विज्ञान विभागले जनाएको छ।
विभागका अनुसार कोशी, मधेश, वागमती र सुदूरपश्चिम प्रदेशका केही तथा बाँकी प्रदेशका थोरै स्थानमा मेघगर्जन र चट्याङसहित हल्कादेखि मध्यम वर्षाको सम्भावना रहेको विभागले जनाएको छ। तराईका केही स्थानमा भने हावाहुरीको सम्भावना देखिएको छ। मेघ गर्जन, चट्याङ र हावाहुरीबाट हुन सक्ने क्षतिबाट बच्न आवश्यक सतर्कता अपनाउन विभागले आग्रह गरेको छ।
देशभर पश्चिमी निम्न चापीय प्रणाली र स्थानीय वायुको प्रभावका कारण वर्षा भइरहेको विभागको भनाइ छ। हिजो राति देशभर आंशिकदेखि सामान्य बदली रही कोशी, मधेश, वागमती, गण्डकी र सुदूरपश्चिमका केही स्थानमा मेघ गर्जन र चट्याङसहित वर्षा भएको थियो।
आज दिउँसो देशभर आंशिकदेखि सामान्य बदली रहने अनुमान छ। मधेश, गण्डकी र लुम्बिनीका केही र बाँकी प्रदेशका थोरै स्थानमा मेघगर्जन र चट्याङसहित हल्कादेखि मध्यम वर्षाको सम्भावना छ। तराईका केही स्थानमा हावाहुरीको जोखिम पनि देखिएको छ।
आज राति पहाडी भेगमा आंशिकदेखि सामान्य बदली रही बाँकी क्षेत्रमा आंशिक बदलीदेखि मौसम सफा रहने पूर्वानुमान छ। कोशी प्रदेशलगायत देशको पहाडी भेगमा मेघगर्जन र चट्याङसहित हल्कादेखि मध्यम वर्षाको सम्भावना देखिएको विभागले जनाएको छ।