लमजुङ– लमजुङकाे सुन्दरबजार नगरपालिका-५ गहतेमा निर्माणधीन मह प्रशोधन केन्द्रको निर्माण अन्तिम चरणमा पुगेको छ।
केन्द्रको निर्माण कार्यको ९० प्रतिशत काम सम्पन्न भएको मौरीजोन सञ्चालक समन्वय समितिले जनाएको छ।
यस समितिका अनुसार जिल्लाभरिका व्यवसायीले उत्पादन गरेका मह प्रशोधन गर्न सो केन्द्र स्थापना गर्न लागिएको हो। मह प्रशोधनका लागि एक तले आर्सिंसी भवनमा ठूलाठूला दुई कोठा निर्माण गरिएको समितिका संयोजक केशबहादुर गुरुङले बताए।
हाल ‘फिनिसिङ’को काम र झ्यालढोका राख्ने काम भइरहेको छ। साथै रङरोगन कार्य गर्न बाँकी छ । गुरुङका अनुसार विसं. २०७९ वैशाखमा सम्झौता भई निर्माण सुरु गरिएको थियो।
एक तले आर्सिसी भवन निर्माण गरिएको उनले बताए। प्रधानमन्त्री कृषि आधुनिकिरण परियोजना नेपालको आर्थिक वर्ष २०७८/७९ को रु १५ लाख र २०७९/८० को रु १४ लाख गरी २८ लाखमा भवन निर्माण भइरहेको बताइएको छ।
समितिका संयोजक गुरुङका अनुसार मह प्रशोधनका लागि ग्रामीण सामुदायिक विकास केन्द्र (आर्सिडिसी)ले रु चार लाख बराबरको मह प्रशोधन मेसिनसमेत सहयोग गरेको छ।
निर्माण कार्य अन्तिम चरणमा पुगेको यस भवनको यही जेठ १५ गतेभित्रमा सम्पन्न गर्ने गरी कामलाई तीव्र बनाइएको छ। परियोजनाका कृषि अधिकृत हरिबहादुर मिजारका अनुसार जिल्लामा बर्सेनि करिब ५० टन बढी मह उत्पादन हुँदै आएको छ।
“जिल्ला तथा जिल्ला बाहिर महको माग उच्च रहेकाले जिल्लाका किसान मौरीपालन तर्फ आर्कषित हुन थालेका छन्, जिल्लामा प्रति किलो रु एक हजार एक सयमा मह बिक्री हुँदै आएको छ।” मिजारले भने।
जिल्लाका किसानले उत्पादन गरेको महलाई घरमा प्रशोधन गर्दा त्यति शुद्ध नहुने भएको तथा धेरै समय लाग्ने भएकाले छिटोछरितो रुपमा मह प्रशोधनका लागि उक्त केन्द्र स्थापना गर्ने तयारी भएको बताइएको छ।
यस केन्द्रमा एक पटकमा एक सय लिटर मह प्रशोधन हुने बताइएको छ।