काठमाडाैं- झुटा विवरण पेस गरी नेपाली नागरिकता लिने १० भारतीय नागरिकलाई काठमाडौं उपत्यका अपराध अनुसन्धान कार्यालयबाट खटिएको प्रहरी टोलीले काठमाडौंबाट पक्राउ गरेकाे छ।
शनिबार उनीहरूलाई बागबजार, शंखमूल, कलंकी र बानेश्वरबाट पक्राउ गरेको कार्यालयले जानकारी दिएकाे हो।
पक्राउ पर्नेमा भारत उत्तर प्रदेशको बलिया इब्राहिमपट्टीका ५५ वर्षीय भरतप्रसाद गुप्ता, ५२ वर्षीय राजेशकुमार गुप्ता ५० वर्षीया ज्ञानमतिदेवी गुप्ता, ४९ वर्षीया मीनादेवी गुप्ता, ४६ वर्षीय भरत गुप्ता, ४४ वर्षीय रामसुन्दर गुप्ता, ४३ वर्षीय रामप्रवेश गुप्ता, ४२ वर्षीया स्नेहलता गुप्ता, ३९ वर्षीय गोपाल गुप्ता र ३० वर्षीय राहुल गुप्ता रहेका छन्।
तराईका विभिन्न जिल्लाबाट नागरिकता बनाउन स्थलगत खटिएको टोलीबाट विभिन्न समयमा उनीहरूले नेपाली नागरिकता लिएको खुलेको काठमाडौं उपत्यका अपराध अनुसन्धान कार्यालयका सूचना अधिकारी प्रहरी उपरीक्षक रवीन्द्र रेग्मीले जानकारी दिए।
प्रहरी उपरीक्षक रेग्मीका अनुसार पक्राउ परेका भारतीय नागरिकले बारा, पर्सा, सिराहा, रुपन्देहीलगायतका जिल्लाबाट नेपालमा घरजग्गा कारोबार गरेको झुटा विवरण पेस गरी नेपाली नागरिकता लिएका पाइएको हो।
प्रहरीले उनीहरूको साथबाट नेपाली नागरिकताको प्रमाणपत्र, मतदाता परिचयपत्र र काठमाडौंमा बसाइँसराइ गरेको प्रमाणपत्रसहित भारतीय दूतावासले प्रदान गरेको भारतीय नागरिक भएको सिफारिसपत्र, भारतीय सवारीचालक अनुमतिपत्र, भारत सरकार आयकर विभागको कार्ड, भारतीय पासपोर्ट र आधार कार्ड बरामद गरेकाे जनाएको छ।