पोखरा- नेपाल खेलकुद पत्रकार मञ्च गण्डकीले आयोजना गर्दैै आएको पोखरा स्पोर्टस् अवार्डको सातौँ संस्करण २३ वैशाखमा पोखरा सभागृहमा हुँदैछ।

गण्डकी प्रदेशका खेलाडी र खेलकुदकर्मीका लागि यो प्रतिष्ठित अवार्ड हो। खेलाडी, प्रशिक्षक, खेलकुद संस्था र खेल पत्रकारले सयौंको उपस्थितिमा प्रतिष्ठित अवार्ड प्राप्त गर्छन्।

खेलाडीले राष्ट्रिय तथा अन्तर्राष्ट्रिय प्रतियोगितामा अघिल्लो वर्ष प्राप्त गरेको सफलताका आधारमा मनोनयनमा परेका खेलाडीमध्ये सर्वोत्कृष्ट छनोट गरी अवार्ड प्रदान दिइन्छ। गण्डकीका खेलाडीले मात्र यसमा सहभागी बन्न पाउँछन्। अवार्डअन्तर्गत वर्ष उत्कृष्ट खेलाडीमा समेत कडा प्रतिस्पर्धा हुने देखिएको छ। यो विधामा क्रिकेटका करण केसी (बागलुङ), आर्चरीका गंगाबहादुर कुँवर (तनहुँ) र टेनिसका प्रदीप खड्का (कास्की) मनोनयनमा परेका छन्।

मनोनयनमा परेका खेलाडीमध्ये खेलमा प्राप्त गरेको उपलब्धीलाई आधार मानेर मञ्चद्वारा गठित छनोट समितिले सर्वोत्कृष्ट खेलाडी छनोट गर्ने मञ्चका अध्यक्ष दीननाथ बरालले बताए।

‘उत्कृष्ट खेलाडी छनोटका मुख्य आधार नै खेलाडीको प्रदर्शन र उपलब्धी हुन्। सोही आधारमा वर्ष उत्कृष्ट खेलाडीलाई अवार्ड प्रदान गर्नेछौं,’ उनले भने। वर्ष उत्कृष्ट खेलाडीको उपाधि जित्नेले टेल्जी नेपालको टाइगर इलेक्ट्रिक स्कुटर र ट्रफी हात पार्नेछन्। नेपाली राष्ट्रिय क्रिकेट टोलीका महत्त्वपूर्ण सदस्य करण केसी अलराउन्डर हुन्। राष्ट्रिय टोलीबाट एक दिवसीय क्रिकेटमा बलिङ तथा फिल्डिङमा ४० खेल खेलेका छन् उनले। यस अवधिमा उनले ३१४ रन बनाएका छन्।

करणले नेपाललाई आईसीसी विश्वकप लिग-२ मा शीर्ष तीनमा रहँदै सोझै विश्वकप छनोटमा पुर्‍याउन योगदान दिएका थिए। साथै, आगामी चार वर्षलाई ओडीआई मान्यता जोगाउन शानदार प्रदर्शन गरेका थिए। नेपालका तीव्र गतिका बलर करण लिग-२ मा सर्वाधिक विकेट लिने खेलाडीको सूचीमा छैटौं स्थानमा थिए।

यस्तै, आर्चरीका कुँवरले गण्डकी प्रदेशमा आयोजित नवौं राष्ट्रिय खेलकुद प्रतियोगितामा तीन स्वर्ण पदक जितेका थिए। व्यक्तिगत रिकर्भ, रिकर्भ पुरुष टोली र रिकर्भ मिक्स टोलीमा उनले स्वर्ण पदक जितेका थिए। आर्चरीमा गण्डकी प्रदेशको टोली च्याम्पियन बनेको थियो।

नेपाली टेनिसका पहिलो वरियताका खेलाडी हुन्, पोखराका खड्का। टेनिसमै १५ वर्षको करिअर पूरा गरेका उनको खेल जीवनको शुरुआत ०६५ सालमा भएको हो। नवौं राष्ट्रिय खेलकुदमा उनले तीन स्वर्ण जितेका थिए। ‘मेन्स सिंगल’, ‘मेन्स डबल’ र ‘टिम इभेन्ट’मा स्वर्ण पदक जितेका थिए। खड्काले सिटिजन बैंक ओपन टेनिस प्रतियोगिताको पुरुष एकल र डबल्समा समेत स्वर्ण पदक हात पारेका थिए।

वर्ष खेलाडी महिला, लाइफटाइम अचिभमेन्ट अवार्ड, वर्ष उत्कृष्ट प्रशिक्षक, वर्ष उदीयमान खेलाडी, वर्ष उत्कृष्ट खेलकुद संघसंस्था वा क्लब र वर्ष उत्कृष्ट खेल पत्रकार गरी कूल सातवटा विधामा अवार्ड प्रदान गरिने मञ्चका महासचिव राजाराम पौडेलले बताए।

वर्ष उत्कृष्ट उदीयमान खेलाडी र वर्ष उत्कृष्ट प्रशिक्षकतर्फका विजेताले ३५ हजार रुपैयाँका साथमा ट्रफी पाउने छन्। ‘लाइफटाइम अचिभमेन्ट अवार्ड’ बक्सिङका प्रशिक्षक विद्याप्रसाद मर्सानीलाई प्रदान गर्ने घोषणा मञ्चले गरिसकेको छ। मर्सानीलाई चाँदीको करुवा, ट्रफी, ताम्रपत्र र दोसल्ला सम्मान गरिनेछ।