काठमाडौ- काठमाडौं विमानस्थलबाट उड्नासाथ दायाँ इन्जिनमा समस्या देखिएको फ्लाई दुबईको विमान सकुशल दुबई अन्तर्राष्ट्रिय विमानस्थलमा अवतरण भएको छ।

दुबई अन्तर्राष्ट्रिय विमानस्थलका अनुसार ‘एफजेड-५७६’ उडान नम्बरको उक्त विमान स्थानीय समयअनुसार मंगलबार बिहान १२ः११ मा अवतरण भएको हो। उक्त विमानमा त्रिभुवन अन्तर्राष्ट्रिय विमानस्थलबाट उड्नेबित्तिकै ठूलो आवाजसहित आगोको झिल्का देखिएका थिए। तर, पाइलटले आकस्मिक अवतरण नगराई उडानलाई निरन्तरता दिएका थिए।

इन्जिनको समस्या समाधान भएको भन्दै पाइलटले गन्तव्यतर्फ नै विमानलाई अगाडि बढाएका थिए।

फ्लाई दुबईले त्रिभुवन अन्तर्राष्ट्रिय विमानस्थलबाट उडेको आफ्नो विमानमा चरा ठोकिएको बताएको छ। विमानमा चालक दलका सदस्य र यात्री गरी १६७ जना सवार थिए।