काठमाडौं- आगामी २४ घण्टा मेघ गर्जनसहित चट्याङ र हल्का वर्षाको सम्भावना रहेकाले उच्च सावधानी अपनाउन जल तथा मौसम विज्ञान विभागले आग्रह गरेको।
विभागका अनुसार खासगरी कोशी र गण्डकी प्रदेशका पहाडी क्षेत्रका १-२ स्थानमा मेघ गर्जन र चट्याङसहित हल्का र क्षणिक वर्षाको सम्भावना देखिएको छ। त्यसक्रममा खासगरी चट्याङबाट हुन सक्ने क्षतिबाट बच्न सतर्कता आवश्यक देखिएको विभागले जनाएको छ।
अहिले नेपालमा पश्चिमीसँगै स्थानीय वायु पनि सक्रिय छ। दुवै वायुबीच घर्षण पैदा हुँदा मेघ गर्जन र चट्याङ पर्ने सम्भावना देखिएको हो।
आज दिउँसो कोशी, मधेश र वागमती प्रदेशमा आंशिक बदली रही बाँकी क्षेत्रमा मौसम सफा रहने पूर्वानुमान छ। यस्तै, कोशी र गण्डकी प्रदेशका पहाडी क्षेत्रका १-२ स्थानमा मेघ गर्जन र चट्याङसहित हल्का र क्षणिक वर्षाको सम्भावना पनि देखिएको छ।
आज राति कोशी, मधेश, वागमती र कर्णाली प्रदेशमा आंशिक बदली रही बाँकी इलाकामा मौसम सफा रहने पूर्वानुमान छ। कर्णाली प्रदेशको पहाडी क्षेत्रका १-२ स्थानमा मेघ गर्जन र चट्याङसहित हल्का र क्षणिक वर्षाको सम्भावना देखिएको छ।