नेपाल चेम्बर अफ कमर्श (एनसीसी) ले करको दायरा बढाउन अर्थमन्त्री डा प्रकाशशरण महतलाई आग्रह गरेको छ । एनसीसीका अध्यक्ष राजेन्द्र मल्लसहितको प्रतिनिधिमण्डलले मंगलबार अर्थमन्त्रीलाई भेटेर करको दायरा फराकिलो गरी राजस्व संकलनको लक्ष्य पूरा गर्न सुझाव दिएको थियो ।
‘करको दर बढाउनुभन्दा करको दायरा बढाउनुपर्छ, यसका लागि नागरिकता प्रमाणपत्रसँगै प्यान कार्ड दिने व्यवस्था मिलाउनुपर्छ’, एनसीसीले भन्यो ।
मल्लले सीमावर्ती क्षेत्रमा हुने अवैध व्यापारलाई पनि निरुत्साहित गरी करको दायरामा ल्याउनुपर्ने र बीजक माग्ने र दिने व्यवस्था अनिवार्य हुनुपर्ने बताए ।
एनसीसी अध्यक्षले अर्थतन्त्रलाई उत्प्रेरित गर्न चाँडोभन्दा चाँडो एकल ब्याजदर निर्धारण गर्न पनि आग्रह गरे। उनले तरलता अभाव व्यवस्थापन गर्न पुँजीगत खर्चको समयसीमा कार्ययोजना तयार गरी कार्यान्वयन गर्न सुझाव दिए ।
एनसीसीले रेमिट्यान्सको पैसा उत्पादनशील क्षेत्रमा लगानी गर्न प्रोत्साहन गर्न सरकारलाई आग्रह गरेको छ ।
बैठकमा अर्थमन्त्री डा महतले सरकारले पछिल्लो आर्थिक अवस्थालाई गम्भीरतापूर्वक लिएको र बजेट र मौद्रिक नीतिको सफल कार्यान्वयनका लागि समन्वय भइरहेको बताए ।
अर्थतन्त्रलाई चलायमान बनाउन नेपाल राष्ट्र बैंकका गभर्नर र सरोकारवाला निकायका सचिवहरुका साथै राजस्व असुली लक्ष्य पूरा नहुने विषयमा भन्सार अधिकारीहरुसँग पनि परामर्श गरिरहेको उनले बताए ।
अर्थमन्त्रीले आगामी आर्थिक वर्षदेखि अर्थतन्त्रले गति लिने विश्वास व्यक्त गरे ।