काठमाडौँ – बाराको क्षेत्र नम्बर–२ मा उपनिर्वाचनका लागि जनता समाजवादी पार्टी (जसपा) का अध्यक्ष उपेन्द्र यादवले उमेदवारी दर्ता गराएका छन् ।

सोमबार मुख्य निर्वाचन अधिकृतको कार्यालयमा पुगेर उनले उमेदवारी दर्ता गराएका हुन् । उनले भने ‘जनता अजय हुन्छ । जनता सबैभन्दा माथि हुन्छ । जनतामा उत्साह उमंग भरिएको छ ।

गत मंसिर ४ गते भएको निर्वाचनमा बारा–२ बाट जसपाकै रामसहायप्रसाद यादव निर्वाचित भएका थिए । उनी उपराष्ट्रपति बनेपछि रिक्त रहेको पदका लागि उपनिर्वाचन हुन लागेको हो ।

आउँदो वैशाख १० गते हुने उपनिर्वाचनका लागि यादवले सत्ता गठबन्धनमा आबद्धमध्ये पाँच दलका तर्फबाट साझा उमेदवारी दिएका हुन् ।

यो क्षेत्रमा एमालेबाट पुरुषोत्तम पौडेल, जनमत पार्टीबाट शिवचन्द्र कुशवाहा, रास्वपाबाट रमेश खरेलले उम्मेदवारी दिँदैछन् ।