काठमाडौं- अब एकै दिन दुई ठूला चलचित्र रिलिज नहुने भएका छन् ।
नेपालकै ठूलो मल्टिप्लेक्स चेन क्यूएफएक्सले अब एउटै मितिमा दुई ठूला चलचित्र रिलिज नगर्ने निर्णय गरेको छ ।
‘निर्माता र वितरकको लडाईंमा सधैँ हल सञ्चालकले गाली खानु परिरहेको छ । वितरकको एकअर्काको इगोको मारमा हल र समग्र नेपाली सिनेमा इन्डस्ट्री परिरहेको छ,’ क्यूएफएक्स चेनका सञ्चालक भास्कर ढुंगाना भन्छन्, ‘अब हामी यो हुन दिँदैनौँ । दुई ठूला चलचित्र एकै दिन रिलिज गर्दैनौँ । दुई ठूला चलचित्र एकै दिन रिलिज गर्दा सबैलाई घाटा हुन्छ भने किन सबैलाई राम्रो हुने काम नगर्ने भनेर हामी अगाडि आएका हौँ । यो पहिलै गरेको निर्णय हो । अब कार्यान्वय गरौँ भन्ने हो ।’
ठूलो ब्यानरका ठूलो चलचित्र एकभन्दा धेरै रिलिज हुँदा स्क्रिन नपुग्ने भएकाले अब एकै दिन दुई वा सोभन्दा ठूला सिनेमा रिलिज नहुने भाष्कर बताउँछन् । सानो ब्यानरका चलचित्र रिलिज हुँदा भने दुई वा शोभन्दा धेरै चलचित्र रिलिज गरिने पनि उनले जानकारी दिए ।
क्यूएफएक्सको यो निर्णयसँगै फागुन १९ गते रिलिज हुने भनिएका दुई ठूला चलचित्र ‘छक्का पञ्जा–४’ र ‘छड्के–२’ मध्ये एउटा चलचित्र ब्याक हुनु पर्ने भएको छ । ढुंगानाका अनुसार फागुन १९ मा ‘छक्का पञ्जा–४’ रिलिज हुनेछ । अगाडि डेट लिएका कारण फागुन १९ मा ‘छक्का पञ्जा–४’ रिलिज गर्ने निर्णय आफूहरूले गरेको उनले स्पष्ट पारे ।
यद्यपि, पहिले डेट लिएकै कारण भन्दा पनि सिनेमाको मेरिटका आधारमा पहिला कुन सिनेमा लगाउने निर्णय हुने उनले स्पष्ट पारे । कुन सिनेमा कहिले राम्रोसँग चल्छ भन्ने हेरेर निर्णय गरिने उनको भनाइ छ ।
अहिलेसम्म ‘छक्का पञ्जा’ सिरिज नै सबैभन्दा धेरै व्यापार गर्ने चलचित्र भएकाले यो सिनेमा उसले भनेको डेटमा रिलिज हुन लागेको पनि उनले स्पष्ट पारे ।