काठमाडौं- बदलिँदो राजनीतिक परिदृष्य, सम्भावना र नयाँ रणनीतिबारे समीक्षा गर्न १५ र १६ पुसमा विवेकशील साझा पार्टीले तनहुँको बन्दिपुरमा समीक्षा बैठक गर्दैछ।
प्रादेशिक हैसियतका पार्टीका अगुवा कार्यकर्ताहरू सम्मिलित समीक्षा बैठकमा निर्वाचन परिणाम, वैचारिकी, बदलिँदो राजनीतिक विकासक्रम, वैकल्पिक राजनीतिको आगामी स्पेस र सहकार्य, ध्रुवीकरणसम्मका खुला छलफल हुने प्रवक्ता प्रकाशचन्द्र परियारले जानकारी दिए।
‘अगुवा साथीहरूसँग निर्ममताका साथ खुला छलफलको फोरमका रूपमा समीक्षा बैठकलाई डिजाइन गरिएको छ, सबै कोणवाट आफ्ना सुझाव, अनुभव र आगामी बाटोबारे अगुवा साथीहरूले बहस गर्नु हुन्छ,’ प्रवक्ता परियारले भने, ‘संघीय समितिले आफ्ना कुरा लाद्ने छैन अगुवाका सुझाव, सल्लाह र रचनात्मक आलोचना लिपीबद्ध गरिनेछ।’
वैकल्पिक राजनीतिक केन्द्रको रूपमा स्थापित विवेकशील साझा पार्टी तत्कालीन अध्यक्ष रवीन्द्र मिश्रको राप्रपा प्रवेशसँगै केही समय शिथिल बनेको थियो। पार्टीलाई नै राप्रपामा मिसाउने मिश्रको कदम असफल बनाई पार्टी बचाएसँगै नयाँ शिराबाट अघि बढ्ने सोचस्वरूप भेला आयोजना गरिएको अध्यक्ष समीक्षा बाँस्कोटाले जानकारी दिइन्।
चुनावको मुखैमा राप्रपा समाहितको विवाद चर्किएसँगै चुनावमा होमिएको विवेकशील साझा पार्टीको लगानीको मत नयाँ उदाएको रास्वपामा रूपान्तरण भएको राजनीतिक विश्लेषकहरूले टिप्पणी गर्दै आएका छन्।
‘मत क्रान्ति भएकै हो, परम्परागत दलहरूलाई मतदाताले चाबुक हानेकै हो। मत बदल्न विवेकशील साझा पार्टीको निरन्तर खबरदारीलाई अवमूल्यन गर्न हुँदैन। पार्टीको आन्तरिक विवाद, सैद्धान्तिक विमति र राप्रपाकरणका कारण यस्तो अवस्था आएको हो। त्यसलाई चिर्न नयाँ नेतृत्व तयार छ,’ बाँस्कोटाले भनिन्।
बन्दिपुरमा समीक्षा बैठकको तयारी पूरा भएको केन्द्रीय सदस्य सुरज प्रधानले जानकारी दिए।