पटना- भारत विहारमा विषाक्त रक्सी सेवनबाट ९२ जनाको मृत्यु भएको छ।
सन् २०१६ मा विहार राज्य सरकारले मदिरा बिक्री र उपभोगमा प्रतिबन्ध लगाए पनि यो महिना दूषित मदिरा पिएर ९२ जनाले ज्यान गुमाएका तथा धेरैलाई अस्पताल भर्ना गरिएको स्थानीय सञ्चारमाध्यमले जनाएका छन्। विषाक्त मदिरा सेवन गरेकाहरूमा चक्कर लाग्ने, बान्ता हुने र दृष्टि धमिलो हुने समस्या छ।
राजधानी पटनाबाट ६० किलोमिटर उत्तरपश्चिमस्थित सारण जिल्लाबाट शुरुमा मृत्यु भएको खबर सार्वजनिक भएको थियो। त्यहाँ सबैभन्दा धेरै ८५ जनाको मृत्यु भएको र २९ जनाले आँखाको ज्योति गुमाएको अल इन्डिया रेडियोले जनाएको छ। राज्यका विभिन्न अस्पतालमा २१ जनाको उपचार भइरहेको र तीमध्ये आठ जनाको अवस्था गम्भीर रहेकाले ज्यान गुमाउनेको संख्या बढ्ने सम्भावना छ।
६ वर्षयता विहारमा विषाक्त रक्सी सेवनबाट एक हजारभन्दा बढीको मृत्यु भइसकेको छ। विषाक्त रक्सी बिक्री गर्ने ६ लाख जनालाई जेल सजायँ दिइएको विपक्षी दलका नेता तथा विहारका सांसद सुशीलकुमार मोदीले बताएका छन्।
भारतका गुजरात, मणिपुर, नागाल्यान्ड र विहारमा मदिरा पूर्ण प्रतिबन्धित छ। केही अन्य राज्यमा पनि यो आंशिक रूपमा प्रतिबन्धित छ। तर, मदिरा उत्पादन, बिक्री र सेवन रोकिएको छैन।
गत जुलाईमा गुजरातमा विषाक्त मदिरा सेवनबाट ४२ जनाको मृत्यु भएको थियो। नेसनल क्राइम रेकर्ड ब्युरोका अनुसार भारतमा गत वर्ष नक्कली मदिरा सेवनबाट ७८२ जनाको मृत्यु भएको थियो। सन् २०२० मा पञ्जाबमा विषाक्त मदिरा पिएका १२० जनाले ज्यान गुमाएका थिए।