काठमाडौं- नेकपा (माओवादी केन्द्र)का उपमहासचिव हरिबोल गजुरेलले गठबन्धन जोगाउनु अहिलेको आवश्यकता भएको बताएका छन् । त्यसका लागि अहिले सरकार गठन गर्दा पहिला नेपाली कांग्रेसलाई पद रोज्न दिनुपर्ने उनले धारणा राखेका छन् ।
माओवादी केन्द्रको आइतबार बिहान बसेको पदाधिकारी बैठकमा उनले प्रधानमन्त्री पदमा भएको हानथापले बाहिर राम्रो सन्देश नगएको र यसले गठबन्धन टुट्न सक्ने बताएका हुन् ।
उनले गठबन्धन जोगाउन पहिला कांग्रेसलाई पद रोज्न दिनुपर्ने, दोस्रोमा माओवादीले, तेस्रोमा नेकपा (एकीकृत समाजवादी) र त्यसपछि गठबन्धनका अरू दलहरूलाई पद रोज्न दिनुपर्ने धारणा आफूले बैठकमा राखेको जानकारी दिए ।
‘अहिलेको पदमा देखिएको हानथापले बाहिर राम्रो सन्देश गएन । यसले गठबन्धन जोगाउँदैन भनेर मैले धारणा राखे,’ उनले भने, ‘पहिले कांग्रेसलाई पद रोज्न दिने, त्यसपश्चात् माओवादी र तेस्रोमा नेकपा (एस)लाई पद रोज्न दिनुपर्छ । अनि, सरकारमा सहभागी हुन आउने अरू दललाई पद रोज्न दिनुपर्छ भनेर मैले धारणा राखे । यसले मात्र गठबन्धनलाई जोगाउँछ ।’
आफ्नो धारणामा अध्यक्ष पुष्पकमल दाहाल ‘प्रचण्ड’ले पनि सहमति जनाएको उनको भनाइ छ ।