काबुल- अफगानिस्तानको मदरसामा भएको विष्फोटमा परी कम्तिमा १५ जना मारिएका छन्। अन्य २७ जना घाइते छन्।

समान्गन प्रान्तको ऐबक शहरस्थित जिहादिया नामक मस्जिदमा विष्फोट गराइएको हो। अफगान टेलिभिजन टोलो न्युजले अस्पतालका अधिकारीहरूलाई उद्धृत गर्दै घटनामा कम्तिमा १५ को मृत्यु र २७ घाइते भएको बताएको हो।

बुधबार अपराह्न नमाजको समयमा विष्फोट गराइएको थियो। कुनै समूहले पनि हालसम्म विष्फोटको जिम्मा लिएको छैन।

अफगानिस्तानमा सत्तारुढ तालिबानको गृह मन्त्रालयका प्रवक्ताले घटनामा ठूलो संख्या घाइते भएका बताएका छन्। स्थानीय अस्पतालका चिकित्सकहरूका अनुसार मारिने र घाइते हुनेमा अधिकांश मदरसाका छात्र छन्।

गृह प्रवक्ता अब्दुल नफी टक्कुरले घटनाबारे अनुसन्धान थालिएको बताएका छन्। र, त्यसमा जिम्मेवार व्यक्ति र समूहविरुद्ध कडा कारवाही गर्ने चेतावनी दिएका छन्।