काठमाडौँ । पाकिस्तानका पूर्वप्रधानमन्त्री इमरान खानमाथि गोली प्रहार भएको एक दिनपछि उनका समर्थकारी सडकमा उत्रिएका छन् । जसका कारण ट्राफिक व्यवस्थालाई अस्तव्यस्त बनेको छ ।
इस्लामाबाद प्रहरीले उनीहरूलाई सवारी साधनमा आगजनी नगर्न अनुरोध गरेको छ । इस्लामावाद प्रहरीले ट्विटरमा भनेको छ, ‘प्रदर्शनकारीले ट्राफिकलाई बन्धक बनाएका छन्, प्रदर्शनकारीलाई सवारी साधनमा आगजनी नगर्न अनुरोध गरिएको छ, रावलपिण्डी प्रशासनलाई रावलपिण्डीको तर्फबाट ढुङ्गा प्रहार रोक्न बारम्बार अनुरोध गरिएको छ ।’
इमरानलाई बिहीबार साँझ वजिराबादको अल्लाहवाला चोकमा पुग्दा गोली प्रहार गरिएको थियो । कन्टेनरमा रहेका खानको खुट्टामा गोली प्रहार भएको थियो ।
पछिल्लो घटनाक्रममा पञ्जाब प्रहरीले गोलीबारीमा सात जना घाइते भएको र एक व्यक्तिको मृत्यु भएको पुष्टि गरेको छ । यसैबीच, खानले आफूलाई चारपटक गोली हानेको बताएका छन् ।
