मस्को* रुसको इजेवस्क शहरस्थित एक स्कुलमा बन्दुकधारीले अन्धाधुन्द गोली चलाउँदा ६ जनाको ज्यान गएको छ। अन्य २० जना घाइते छन्।

बन्दुकधारी आफैंले गोली चलाएर आत्महत्या गरेका छन्। मृतकमध्ये पाँच स्कुले बालबालिका छन् भने एक सुरक्षा गार्डको पनि मृत्यु भएको छ।

गोली चलाइएका बेला स्कुलमा एक हजारभन्दा बढी विद्यार्थी थिए। उक्त स्कुलमा ८० शिक्षक छन्।

समाचार एजेन्सी आरआईएले गभर्नर अलेक्जेन्डर ब्रचालोफको भनाइ उद्धृत गदैै बन्दुकधारीले शुरुमा सुरक्षा गार्डको हत्या गरेको उल्लेख गरेको छ। त्यसपछि बालबालिकामाथि अन्धाधुन्द गोली बर्साएका थिए।

गोली प्रहारबाट बच्न बालबालिका डेस्कमुनि लुकिरहेको भिडियो सामाजिक सञ्जालमा सेयर गरिएको छ। समाचार एजेन्सी तासका अनुसार बन्दुकधारीले दुईवटा पेस्तोल बोकेका थिए।