काठमाडौं- गोंगबुस्थित नयाँ बसपार्क क्षेत्रका होटलमा अनिवार्य रूपमा सीसी क्यामेरा जडान गराइने भएको छ।
नेपाल होटल व्यवसायी संघले होटल क्षेत्रको सुरक्षा र होटलमा हुनसक्ने विभिन्न खालका आपराधिक क्रियाकलाप रोक्न अनिवार्य रूपमा सीसी क्यामेरा जडान गर्न निर्देशन दिएको हो।
संघका अध्यक्ष गणेश ढकालले आफ्ना सदस्य रहेका होटलहरूको निरन्तर अनुगमन गरी व्यवसाय सञ्चालन गर्दा अपनाउनुपर्ने सतर्कताका बारेमा जानकारी दिँदै सबै होटलले अनिवार्य सीसी क्यामेरा जडान गर्न निर्देशन दिइएको बताए।
यस्तै, वडा कार्यालय र अन्य ठाउँमा दर्ता नभएका होटललाई दर्ता गर्न लगाई मर्यादित ढंगले सञ्चालन गर्नसमेत आग्रह गरिएको छ। कानूनले नदिएका अनैतिक क्रियाकलाप रोक्नका लागि होटलमा आउने पाहुनाको अनिवार्य रेकर्ड राख्नुपर्ने भएको छ।
होटल व्यवसायीको हक, हित र अधिकारका लागि लड्ने उद्देश्यले ०५७ सालमा स्थापना भएको संघमा हाल नयाँ बसपार्क, सुन्धारा, बाँसवारीलगायत क्षेत्रका चार सयभन्दा बढी होटल व्यवसायी आबद्ध छन्।