काठमाडौँ । काठमाडौं महानगरका मेयर बालेन शाहले होटल तथा रेस्टुरेन्टको शौचालय सञ्चालन गर्नेलाई मात्र कर छुट दिन सकिने बताएका छन् । महानगर कार्यपालिकाको दोस्रो बैठकमा प्रश्नको जवाफ दिँदै उनले यस्तो बताएका हुन् ।
‘हामीले कुनै पनि संस्थालाई, रेस्टुरेन्टलाई कर लगाएको होइनौं, रेस्टुरेन्टलाई कर छुट दिँदा बैंकलाई कर छुट दिन सकिन्छ कि सकिदैन भन्ने छ,’ मेयर शाहले भने, ‘एउटालाई मात्र कर छुट दिँदा अर्कोलाई भेदभाव हुन सक्छ, रेस्टुरेन्टको कुरामा कर छुट कुरा आएको थियो, तर त्यो चाहिँ बैंकलाई लागू हुँदैन, बैंकको कर धेरै हुन्छ त्यो भएर ४–४ महिनामा सरसफाइ सामाग्री दिने निर्णय गरेको छ, त्यो महानगरको तर्फबाट जान्छ ।’
उनले बैंक तथा संस्थाहरूको शौचालय कार्यालय समयमा मात्र सञ्चालन हुने भएकाले होटल तथा रेस्टुरेन्ट जस्तो नहुने बताए । काठमाडौं महानगरले बनाउँदै आएको स्मार्ट शौचालयको निर्माण निरन्तर हुने पनि उनले बताए ।