काठमाडौं- आज १४ जुलाई। विश्व इतिहासका अनगिन्ती घटनाले आजको दिन स्मरण गराउँछन्। प्रस्तुत छ, आज भएका केही विश्व चर्चित घटनाको सारसंक्षेप।
– सन् १९५८- इराकमा सैन्य ‘कु’
सन् १९५८ मा आजकै दिन इराकमा एक जर्नेलले सैन्य ‘कु’मार्फत सत्ता आफ्नो हातमा लिएका थिए। ब्रिगेडियर अब्द अल-करिम कसिमले उक्त ‘कु’मार्फत हासेमिते राजतन्त्रलाई फालेका थिए। सैन्य ‘कु’का क्रममा इराकी राजा फैजल द्वितीय, युवराज अब्द अल-इलाह र प्रधानमन्त्री नुरी अल-सइद मारिएका थिए। कसिमले आफूलाई प्रधानमन्त्री घोषित गरेका थिए। सन् १९६३ सम्म उनी सोही पदमा रहे। उक्त सैन्य ‘कु’का कारण इराक र जोर्डनबीच गठित अरब फेडेरेसन पनि विघटन भएको थियो।
– सन् १९६५- मंगल ग्रहमा अमेरिकी यान
सन् १९६५ मा आजकै दिन मंगल ग्रहमा पुगेर अमेरिकी अन्तरिक्ष यान ‘मरिनर-४’ले तस्बिर खिचेको थियो। कुनै ग्रहमा पुग्ने त्यो पहिलो अन्तरिक्ष यान थियो। र, त्यसले पृथ्वीमा आफूले खिचेका तस्बिरहरू पठाएको थियो।
– सन् २०१६- फ्रान्समा आतंककारी आक्रमण
सन् २०१६ मा आजकै दिन फ्रान्सको निसेमा आतंककारी आक्रमण भएको थियो। त्यसमा परी ८५ जनाको ज्यान गएको थियो भने ३०० भन्दा बढी घाइते भएका थिए। बास्टिले डे मनाउने क्रममा जम्मा भएको भीडका १९ टनको ट्रक हुइँक्याइएको थियो। प्रहरीले उक्त ट्रक हुइँक्याउने आतंककारीलाई गोली हानी मारेको थियो।
– सन् २०२०- पखेटा नचलाई ५ घण्टा उड्ने चरो
सन् २०२० मा आजकै दिन वैज्ञानिकहरूले एन्डियन कोन्डोर नामक चरो पखेटा नचलाई ५ घण्टासम्म उड्न सक्ने पत्ता लगाएका थिए। अमेरिकाको नेसनल एकेडेमी अफ साइन्सेसको अध्ययनमा उक्त तथ्य पत्ता लागेको थियो।
– सन् २०२१- ड्रग ओभरडोजबाट अमेरिकामा ९३ हजारको मृत्यु
सन् २०२१ मा आजकै दिन सार्वजनिक भएको रिपोर्टअनुसार ड्रग ओभरडोजका कारण सन् २०२० मा ९३ हजारजनाको ज्यान गएको थियो। सेन्टर फर डिजिज कन्ट्रोल तथा प्रिभेन्सनले जारी गरेको आधिकारिक रिपोर्टमा उक्त वर्ष ड्रग ओभरडोजका केसहरूमा ३० प्रतिशतले बढोत्तरी भएको पाइएको थियो।
– सन् २०२३- भारतको चन्द्रयान-३
भारतले आजकै दिन चन्द्रयान-३ नामक अन्तरिक्ष यान प्रक्षेपण गरेको थियो। यो भारतको तेस्रो चन्द्रमा मिसन थियो।