पोखरा । नेपाल यातायात व्यवसायी राष्ट्रिय महासंघको ७औं राष्ट्रिय महाधिवेशन अन्तर्गत नयाँ नेतृत्व चयनको प्रक्रिया अझै टुंगोमा पुग्न नसक्दा निर्वाचन कार्यक्रम प्रभावित बनेको छ ।
निर्वाचन तालिका अनुसार सोमवार बिहान ९ः३० बजेदेखि उम्मेदवारी दर्ता प्रक्रिया शुरु गर्ने तयारी गरिएपनि अहिलेसम्म निर्वाचन कार्यतालिका कार्यान्वयन हुन सकेको छैन । नेतृत्व चयनका विषयमा सहमति जुटाउने प्रयास जारी रहेपछि निर्वाचन प्रक्रिया अनिश्चित बनेको हो ।
निर्वाचन प्रक्रिया ढिलाइ भएपछि अधिवेशन उद्घाटन गरिएको पोखरा इभेन्ट सेन्टरको हलमा सहभागी प्रतिनिधि तथा मतदातालाई व्यस्त राख्न फिल्म प्रदर्शन गरिएको छ । लामो समयसम्म निर्वाचन सम्बन्धी औपचारिक सूचना नआएपछि प्रतिनिधिहरू हलमै फिल्म हेरेर समय बिताइरहेका छन् ।
यसैबीच निर्वाचन समितिका संयोजक कृष्ण प्रसाद ज्ञवालीले अर्को सूचना जारी गर्दै केही बेरमै नयाँ निर्वाचन तालिका सार्वजनिक गरिने जानकारी दिएका छन् ।
महासंघको नेतृत्वका लागि वरिष्ठ उपाध्यक्षद्वय पुण्य प्रसाद सिटौला (सरोज) र हरिशरण के.सी. (हुस) प्यानलसहित प्रतिस्पर्धामा रहेका छन् । सहमतिको प्रयास असफल भए निर्वाचन प्रक्रियामार्फत नयाँ नेतृत्व चयन हुने बताइएको छ ।
देशभरबाट आएका करिब ३ हजार प्रतिनिधिको उपस्थितिमा जारी महाधिवेशनमा चुनावी माहोल थप रोचक बन्दै गएको छ ।
