काठमाडौं- आज १० अप्रिल। विश्व इतिहासका अनेकन घटनाले देश, क्षेत्र र स्थान विशेषमा आजको दिनको सम्झना ताजा गराउँछन्। प्रस्तुत छ, तीमध्ये केही विश्व चर्चित घटनाहरूको सारसंक्षेप।
– सन् १६३३- लन्डनमा पहिलोपटक केराको सार्वजनिक बिक्री
३९३ वर्षअघि बेलायतको राजधानी शहर लन्डनमा पहिलोपटक आजकै दिन केराको सार्वजनिक बिक्री शुरु भएको थियो। लन्डनमा पहिलोपटक केरा बिक्रीमा राख्ने व्यापारी थिए, थोमस जोनसन। बेलायतमा उनले फलाएको केराको बीउ उत्तर एटलान्टिक महासागरको टापु बर्मुडाबाट ल्याइएको थियो। उनको छिमेकको स्नो हिलमा हर्बलिस्टको दोकान थियो, जसलाई अहिले पनि हर्लबर्न भनिन्छ।
– सन् १८१५- माउन्ट टम्बोरामा इतिहासकै ठूलो ज्वालामुखी विष्फोट
इन्डोनेसियाको माउन्ट टम्बोरामा आजकै दिन पृथ्वीको रेकर्डेड इतिहासमा हालसम्मकै ठूलो ज्वालामुखी विष्फोट भएको थियो। त्यसमा परी कम्तिमा ७१ हजार मानिसको ज्यान गएको थियो। उक्त विष्फोटको आवाज २ हजार किलोमिटर टाढासम्म सुनिएको थियो।
– सन् १९७०- ‘द बिटल्स’मा ब्रेकअप
सन् १९७० मा आजकै दिन संसार प्रसिद्ध सांगीतिक ब्यान्ड ‘द बिटल्स’का सदस्यबीच ब्रेकअप भएको थियो। पल म्याक कार्टनीले ब्यान्डसँगको नाता तोडेका थिए। त्यसअघिको १० वर्षभित्र ब्रिटिस रक ग्रुप ‘द बिटल्स’ सदावहार सफल ब्यान्ड बनेको थियो। १ अर्बभन्दा बढी एल्बम बिक्रीमार्फत ब्यान्डले संसारभर प्रसिद्धि हासिल गरेको थियो। आफ्नो पहिलो सोलो एल्बम आउनु एक साताअघि म्याक कार्टनीले ब्यान्डबाट विदा लिएका थिए। र, उक्त एल्बमबाट पनि उनले प्रसिद्धि हासिल गरेका थिए।
– सन् २००१- नेदरल्यान्ड्समा इच्छा मृत्युलाई कानूनी मान्यता
सन् २००१ मा नेदरल्यान्ड्सको संसदले एक विवादास्पद विधेयक पारित गर्दै इच्छा मृत्युलाई कानूनी मान्यता दिएको थियो। असह्य र निको नहुने बिमार लागेका व्यक्तिलाई उक्त कानूनमार्फत स्वेच्छाले मृत्युवरण गर्न छूट दिएको थियो।
– सन् २०१०- जहाज दुर्घटनामा पोल्यान्डका राष्ट्रपतिको मृत्यु
सन् २०१० मा आजकै दिन भएको जहाज दुर्घटनामा पोल्यान्डका राष्ट्रपति लेक काक्जेन्सीको मृत्यु भएको थियो। घटनामा पोल्यान्ड सरकारका केही उच्च अधिकारी, पोलिस पादरीहरूका वरिष्ठ सदस्य, क्याटिन नरसंहारमा मारिएकाहरूका परिवारका सदस्यहरूको पनि मृत्यु भएको थियो। पाइलटको त्रुटि र खराब मौसमका कारण जहाज दुर्घटना भएको अनुसन्धानबाट खुलेको थियो।
– सन् २०१६- आतिशबाजीको आगोमा परी १०० को मृत्यु
सन् २०१६ मा आजकै दिन भारतको केरलास्थित पुतिंगल मन्दिरमा आतिशबाजीका कारण आगलागी भएको थियो। त्यसमा परी १०० जनाभन्दा बढी मारिएका थिए भने करिब ४०० घाइते भएका थिए।
– सन् २०१९- ब्ल्याक होलको पहिलो तस्बिर
सन् २०१९ मा आजकै दिन वैज्ञानिकहरूले ब्ल्याक होलको पहिलो तस्बिर सार्वजनिक गरेका थिए। उक्त ब्ल्याक होल ‘एम-८७’ नामक विशाल ग्यालेक्सीको केन्द्रमा अवस्थित छ।
– सन् २०२३- दलाई लामाले मागे माफी
तिब्बती धार्मिक गुरु दलाई लामाले सन् २०२३ मा आजकै दिन सार्वजनिक रूपमा माफी मागेका थिए। एक युवकलाई आफ्नो जिब्रो चुसिदिन आग्रह गर्दै गरेको भिडियो सार्वजनिक भएपछि दलाई लामाको विश्वव्यापी आलोचना भएको थियो। त्यसपछि उनले गल्ति भएको भन्दै माफी मागेका थिए।