काठमाडौं- आज ३ अप्रिल। विश्व इतिहासका असंख्य घटनाले देश, क्षेत्र र स्थानपिच्छे आजको दिन स्मरण गराउँछन्। प्रस्तुत छ, तीमध्ये विश्वभर चर्चित केही प्रमुख घटनाको सारसंक्षेप।
– सन् १८८५- इन्जिनको डिजाइनका लागि जर्मन इन्जिनियरलाई प्याटेन्ट
सन् १८८५ मा आजकै दिन जर्मनीका इन्जिनियर गोटलिब डेम्लरलाई इन्जिनको डिजाइनका लागि प्याटेन्ट प्रदान गरिएको थियो। उनलाई क्लक इन्जिनका पिता पनि भन्ने गरिन्छ। उनले विकास गरेको इन्जिन अटोमोबाइलको आविष्कारका लागि कोशेढुंगा मानिन्छ।
– सन् १९४०- पोल्यान्डका २२ हजार नागरिकको सोभियत सेनाद्वारा हत्या
सन् १९४० मा आजकै दिन सोभियत सैनिकहरूले पोल्यान्डका २२ हजार नागरिकको हत्या गरेका थिए। काटिन हत्याकाण्डलाई इतिहासमै युद्धबन्दीहरू माथि गरिएको सबैभन्दा भयानक नरसंहार मानिन्छ। सोभियत संघका नेता जोसेफ स्टालिनले सबै युद्धबन्दीको हत्या गर्न आदेश दिएका थिए।
– सन् १९७३- म्यानहटनको फुटपाथमा पहिलो मोबाइल कल
सन् १९७३ मा आजकै दिन पहिलोपटक अमेरिकाको म्यानहटनस्थित फुटपाथमा मोबाइलबाट पहिलो कल गरिएको थियो। मोटोरोलाका मार्टिन कुपरले बेल ल्याब्सलाई मोबाइल कलमार्फत सडकमा बोलाएका थिए। पछि उनले बीबीसीसँग भनेका थिए, ‘जोएल, म तिमीलाई एक असली सेल्युलर टेलिफोनबाट कल गरिरहेको छु। यो एक पोर्टेबल ह्यान्डहेल्ड टेलिफोन हो।
– सन् १९९६- चिठ्ठी बम्बर टेड केजिन्स्की पक्राउ
सन् १९९६ मा आजकै दिन चिठ्ठीमार्फत बम पठाएर मानिसको ज्यान लिँदै आएका गणितज्ञ टेड केजिन्स्की पक्राउ परेका थिए। अराजकतावादी विचारबाट प्रभावित उनले सन् १९७८ देखि १९९५ सम्ममा १६ वटा पत्र बम पठाएको खुलासा भएको थियो। त्यसमा परी ३ जना मारिएका थिए भने २३ जना घाइते भएका थिए।
– सन् २०१६- पानामा पेपर सार्वजनिक
सन् २०१६ मा आजकै दिन पानामा पेपर सार्वजनिक गरिएको थियो। पानामा ल फर्मले विश्वमा कसरी कर छली हुँदै आएको छ र कालोधन कसरी लुकाइँदै आएको छ भन्ने सार्वजनिक गरेको थियो। यो गोप्य तथ्यांकहरूको सबैभन्दा ठूलो खुलासा थियो।
– सन् २०२२- अफिम खेतीमा तालिबानको प्रतिबन्ध
सन् २०२२ मा आजकै दिन अफगानी तालिबानले अफिम खेतीमा प्रतिबन्ध लगाएको थियो। विश्वमै अफिमको ८० प्रतिशत उत्पादन अफगानिस्तानमा हुने गरेको छ। र, तालिबानको प्रतिबन्धले अवैध लागूपदार्थको विश्वव्यापी प्रसारमा प्रभाव पारेको थियो।
– सन् २०२३- चार अन्तरिक्ष यात्री चन्द्रमामा जाने घोषणा
सन् २०२३ मा अमेरिकी अन्तरिक्ष अभियान नासाले चारजना अन्तरिक्ष यात्री चन्द्रमामा जाने घोषणा गरेको थियो। आर्टमिस-२ मिसनमा क्रिस्टिना ह्यामोक कोच, भिक्टर ग्लोभर, रेड वाइजम्यान र क्यानाडाका खगोलविद जेरेमी ह्यान्सेन चन्द्रमामा जाने घोषणा थियो त्यो। उनीहरू १ अप्रिल २०२६ मा मात्र चन्द्रमाका लागि प्रस्थान गरेका थिए।
– सन् २०२४- ताइवानमा शक्तिशाली भूकम्प
सन् २०२४ मा आजकै दिन ताइवानमा ७.४ रेक्टर स्केलको शक्तिशाली भूकम्प गएको थियो। त्यसमा परी ९ जनाको मृत्यु भएको थियो भने करिब ९०० जना घाइते भएका थिए।