काठमाडौं- आज २ अप्रिल। विश्व इतिहासका असंख्य घटनाले देश, क्षेत्र र स्थान विशेषमा आजको दिन स्मरण गराउँछन्। प्रस्तुत छ, तीमध्ये विश्वव्यापी चर्चा बटुलेका केही प्रमुख घटनाको सारसंक्षेप।
– सन् २००२- इजरायली सेनाले घेरामा पार्यो बेथलहेम चर्च
सन् २००२ मा आजकै दिन इजरायली सेनाले बेथलहेमस्थित चर्च अफ नेटिभिटी घेराउ गरेको थियो। चर्चमा रहेका प्यालेस्टिनीहरूलाई पक्राउ गर्न उक्त घेराबन्दी गरिएको थियो। ३० दिनसम्म चलेको घेराउ केही आतंकवादीहरू चर्चबाट भागेपछि शुरु भएको थियो।
– सन् १९८२- फकल्यान्ड टापुमाथि अर्जेन्टिनाको कब्जा
सन् १९८२ मा आजकै दिन अर्जेन्टिनाले फकल्यान्ड टापुमाथि कब्जा जमाएको थियो। दक्षिण एटलान्टिकमा फकल्यान्ड द्विप समूहलाई लिएर अर्जेन्टिना र ब्रिटेनबीच लडाईं भएको थियो। त्यसपछि लामो समय फकल्यान्ड युद्ध भएको थियो। यस युद्धमा ब्रिटेनले जित हासिल गरेको थियो।
– सन् १७९२- अमेरिकी डलरको शुरुवात
२३३ वर्षअघि सन् १७९२ मा आजकै दिन अमेरिकी डलरको शुरुवात भएको हो। ‘द मिन्ट एक्ट’मार्फत डलर अमेरिकाको मुद्राका रूपमा स्थापना भएको थियो। आजको दिन विश्व व्यापारको करिब दुई तिहाइ हिस्सा अमेरिकी डलरमा आधारित छ।
– सन् २०२३- समुद्रको सबैभन्दा गहिराइमा भेटिए जीवित माछा
सन् २०२३ मा आजकै दिन समुद्रको हालसम्मकै सबैभन्दा गहिराइमा जीवित माछा फेला परेका थिए। ती माछाको भिडियो फुटेज आजकै दिन सार्वजनिक गरिएको थियो। स्नेलफिस नाम दिइएका माछा जापानको दक्षिणी क्षेत्रस्थित इजु-ओगासावरा ट्रेन्चको २७ हजार ३४९ फिट (८ हजार ३३६ मिटर) गहिराइमा क्यामेरामा कैद भएका थिए।
– सन् २०२१- डाइनोसर मासेको क्षुद्र ग्रहले बनायो दक्षिण अमेरिकी वर्षा वन
६ करोड ६० लाख वर्षअघि पृथ्वीमा ठक्कर खाएको क्षुद्र ग्रहकै कारण दक्षिण अमेरिकाको वर्षा वन (उष्णकटिबन्धीय जंगल) निर्माण भएको एक अध्ययन सार्वजनिक गरिएको थियो। सोही क्षुद्र ग्रहको ठक्करका कारण धर्तिबाट डाइनोसर लोप भएको निष्कर्ष वैज्ञानिकहरूको छ। डाइनोसर लोप भएपछि नै धर्तिमा मानिसलगायत जीवहरूको अस्तित्व देखिन थालेको मानिन्छ।