काठमाडौं- आज २९ मार्च। विश्व इतिहासका अनगिन्ति घटनाले देश, क्षेत्र र स्थान विशेषमा आजको दिन स्मरण गराउँछन्। प्रस्तुत छ, आजको दिन भएका विश्व चर्चित केही घटनाको सारसंक्षेप।
– सन् १९७१- चार्ल्स मेन्सनलाई ग्यास चेम्बरमा मृत्युदण्ड दिने फैसला
अमेरिकाका एक कुख्यात अपराधी चार्ल्स मेन्सनलाई आजकै दिन ग्यास चेम्बरमा राखेर मृत्युदण्ड दिने निर्णय भएको थियो। तर, सन् १९७२ मा क्यालिफोर्नियाको सर्वोच्च अदालतले उक्त निर्णय बदर गरेको थियो। मृत्युदण्डबाट बचेका मेन्सनको १९ नोभेम्बर २०१७ मा आजीवन काराबासको क्रममा मृत्यु भयो।
– सन् १९७४- चीनमा फेला परे टेराकोटा सैनिक
चीनको सियानमा आजकै दिन टेराकोटा आर्मी फेला परेका थिए। सम्राट किन सि ह्वाङको सेनालाई चित्रण गर्ने लगभग ८ हजार सैनिकका मूर्तिहरूको प्रसिद्ध संग्रह स्थानीय किसानहरूले पानीको इनार खन्ने क्रममा राखेका थिए।
– सन् २००४- चुरोटमा पूर्ण प्रतिबन्ध लगाउने पहिलो मुलुक
सन् २००४ मा आयरल्यान्डले कार्यस्थलमा चुरोट सेवन गर्न पूर्ण प्रतिबन्ध लगाएको थियो। त्यससँगै कार्यस्थलमा चुरोट प्रतिबन्ध लगाउने आयरल्यान्ड पहिलो मुलुक बनेको थियो। प्रारम्भिक चिन्ताविपरीत प्रतिबन्धले कुनै प्रतिकूल आर्थिक प्रभाव पारेन। र, चाँडै अन्य धेरै देशले पनि समान कानून पारित गरे। विश्व स्वास्थ्य संगठनका अनुसार विश्वव्यापी रूपमा रोकथाम गर्न सकिने मृत्युको सबैभन्दा ठूलो कारण सुर्तीजन्य पदार्थको धुवाँ हो।
– सन् २०१०- मस्कोमा आत्मघाती आक्रमण, ४० को मृत्यु
सन् २०१० मा आजकै दिन रुसको राजधानी मस्कोस्थित भूमिगत सडकमा दुई चेचेन विद्रोहीहरूले आत्मघाती विष्फोट गराएका थिए। त्यसमा परी ४० जनाको ज्यान गएको थियो। ‘ब्ल्याक विडो’ नामक इस्लाम चेचेन विद्रोहीहरूले उक्त विष्फोट गराएका थिए। र, आत्मघाती आक्रमणकारी दुवै महिला थिए।
– सन् २०२३- अन्टार्कटिकामा गहिरा धाराहरू ध्वस्त हुने चेतावनी
सन् २०२३ मा आजकै दिन शोधकर्ताहरूले अन्टार्कटिकाको गहिराइका धाराहरू सन् २०५० सम्ममा ४२ प्रतिशत ध्वस्त हुने चेतावनी दिएका थिए। त्यसका कारण पोषक तत्त्वले भरिपूर्ण पानी उत्तरतर्फ बहन बन्द हुने र हिउँ पग्लिने क्रम तीव्र हुने प्रक्षेपण उनीहरूको छ। त्यसका कारण पृथ्वीका महासागरहरूमा अत्यधिक गर्मी बढ्ने चेतावनी पनि उनीहरूले दिएका थिए।