टोकियो- कमजोर आन्तरिक तथा चिनियाँ मागबीच पनि निर्यातमा सुधार आउँदा जापानको व्यापार स्थिति फेब्रुअरीमा उल्लेखनीय रूपमा उल्टिएको छ । सरकारी तथ्याङ्कअनुसार एक महिनाअघि घाटामा रहेको जापानले फेब्रुअरीमा ५७ अर्ब ३० करोड येन (करिब ३६ करोड डलर) को व्यापार अधिशेष हासिल गरेको छ ।

वित्त मन्त्रालयले सार्वजनिक गरेको मौसमी रूपमा समायोजित प्रारम्भिक तथ्याङ्कले निर्यात ४.२ प्रतिशतले बढेर ९५ खर्ब ७० अर्ब येन पुगेको देखाएको छ । यसले अपेक्षाभन्दा राम्रो प्रदर्शन गरेको सङ्केत गरेको छ । यसैबीच, जनवरीमा २.५ प्रतिशतले घटेको आयात फेब्रुअरीमा १०.२ प्रतिशतले बढेर ९५ खर्ब १० अर्ब येन पुगेको छ । यसले ऊर्जा लागत र कच्चा पदार्थको मूल्य वृद्धिको प्रभाव झल्काउँछ ।

अघिल्लो महिना जापानले ठूलो व्यापार घाटा व्यहोरेको अवस्थामा फेब्रुअरीको अधिशेषलाई सुधारको सङ्केतका रूपमा लिइएको छ । तर विश्लेषकहरूका अनुसार यो सुधार दीर्घकालीन रूपमा टिकाउ हुनेमा अझै अनिश्चितता कायमै छ ।

मध्यपूर्वमा इरानसँगको युद्धका कारण होर्मुज जलडमरूमध्यमा अवरोध उत्पन्न हुँदा तेल आपूर्तिमा जोखिम बढेको छ । जापानले आफ्नो लगभग सम्पूर्ण तेल आयात गर्ने भएकाले बढ्दो ऊर्जा मूल्यले आयात लागत थप बढाउने अनुमान गरिएको छ । अन्तर्राष्ट्रिय बजारमा ब्रेन्ट कच्चा तेलको मूल्य हालै प्रति ब्यारेल करिब १०० डलरसम्म पुगेको छ ।

भूराजनीतिक तनावबीच पनि कमजोर येनले जापानलाई केही राहत दिएको देखिन्छ । अमेरिकी डलरको तुलनामा येन कमजोर भई करिब १५९ येनसम्म पुगेको छ । यो एक वर्षअघि १५० येनभन्दा कम थियो । यसले निर्यात प्रतिस्पर्धात्मकता बढाएको विश्लेषण गरिएको छ ।

यद्यपि प्रमुख व्यापार साझेदार चीनतर्फको निर्यात १०.९ प्रतिशतले घटेको छ । चन्द्र नयाँ वर्षका कारण माग असामान्य रूपमा कमजोर भएको यसका कारणमध्ये एक मानिएको छ । संयुक्त राज्य अमेरिकातर्फको निर्यात पनि आठ प्रतिशतले घटेको छ । यसमा अटो निर्यातमा आएको कमी मुख्य कारण हो । अमेरिकी राष्ट्रपति डोनाल्ड ट्रम्पले जापानी सवारी साधनमा लगाएको १५ प्रतिशत भन्सार शुल्कले अटो उद्योगमा दबाब कायम राखेको छ ।

यसको विपरीत, युरोपतर्फको निर्यात भने उल्लेखनीय रूपमा बढेको  । यो एक वर्षअघिको तुलनामा १७ प्रतिशतले वृद्धि भएको छ । एसियाका अन्य देशहरूतर्फको निर्यात पनि २.८ प्रतिशतले बढेको छ ।

अब लगानीकर्ताहरूको ध्यान बैंक अफ जापानको मौद्रिक नीतितर्फ केन्द्रित भएको छ । दुई दिने बैठकपछि ब्याजदरसम्बन्धी निर्णय सार्वजनिक हुने अपेक्षा गरिएको छ । केसिएम ट्रेडका प्रमुख बजार विश्लेषक टिम वाटररले बढ्दो तेल मूल्य अस्थायी हो कि दीर्घकालीन प्रवृत्ति बन्ने हो भन्ने मूल्याङ्कनपछि मात्र केन्द्रीय बैंकहरूले कडा नीति अवलम्बन गर्ने सङ्केत देखिन सक्ने बताउनुभएको छ ।

यसै साता अमेरिकी राष्ट्रपति डोनाल्ड ट्रम्प र जापानकी प्रधानमन्त्री साने ताकाइचीबीच हुने शिखर वार्ताले पनि आर्थिक र व्यापारिक सम्बन्धमा नयाँ दिशा दिन सक्ने भएकाले लगानीकर्ताहरू त्यसतर्फ पनि चासोपूर्वक हेरिरहेका छन् ।