काठमाडौं- आज ५ मार्च। विश्व इतिहासका असंख्य घटनाले आजको दिनलाई देश, क्षेत्र, स्थान विशेष मात्र नभई संसारभर परिचित गराउँछन्। प्रस्तुत छ, आजको दिन विश्व इतिहासमा भएका केही प्रमुख घटनाको सारसंक्षेप।
– सन् १८७२- एयर ब्रेकलाई प्याटेन्ट
सन् १८७२ मा आजकै दिन एयर ब्रेकलाई प्याटेन्ट प्रदान गरिएको थियो। जर्ज वेस्टिङहाउसले उक्त प्याटेन्ट प्राप्त गरेका थिए। रेलको ब्रेकिङ प्रणालीका लागि उक्त ब्रेक प्रयोग गरिएको थियो।
– सन् १९६०- चे ग्वेभाराको विश्व प्रसिद्ध तस्बिर
सन् १९६० मा आजकै दिन अल्बर्टो कोर्डाले वामपन्थी नेता चे ग्वेभाराको विश्व प्रसिद्ध तस्बिर खिचेका थिए। उक्त तस्बिरलाई ‘ग्वेरिलेरो हिरोइको’ नाम दिइएको थियो।
– सन् १९७०- परमाणु अप्रसार सन्धि कार्यान्वयन
सन् १९७० मा आजकै दिन परमाणु अप्रसार सन्धि कार्यान्वयनमा आएको थियो। चीन, रुस, अमेरिका, बेलायत र फ्रान्सबीच सन् १९६८ मा उक्त सन्धि भएको थियो। उक्त सन्धिलाई १९० मुलुकले प्रमाणीकरण गरेका छन्।
– सन् १९८१- होम कम्प्युटर ‘जेडएक्स ८१’ सार्वजनिक
सन् १९८१ मा आजकै दिन पहिलो होम कम्प्युटर ‘जेडएक्स ८१’ सार्वजनिक भएको थियो। बेलायतमा बनेको विश्वको पहिलो होम कम्प्युटर १ करोड ५० लाख थान बिक्री भएको थियो।
– सन् २०१४- युरोपका एक तिहाइ महिलामाथि यौन दुर्व्यवहार
सन् २०१४ मा आजकै दिन प्रकाशित भएको रिपोर्टले युरोपेली मुलुकका एक तिहाइ महिलाले किशोरावस्थामै यौन दुर्व्यवहारको शिकार बन्नु परिरहेको खुलासा गरेको थियो। १५ वर्षभन्दा कम उमेरका एक तिहाइ किशोरीहरूले शारीरिक र यौन दुर्व्यवहार खेप्नु परिरहेको रिपोर्टमा उल्लेख थियो। युरोपियन युनियनको ‘एजेन्सी अफ फन्डामेन्टल राइट्स’ले गरेको सर्वेक्षणमा उक्त खुलासा गरिएको थियो।
– सन् २०१६- अमेरिकी आक्रमणमा मारिए डेढ सय
सन् २०१६ मा आजकै दिन अफ्रिकी मुलुक सोमालियामा अमेरिकाले गरेको हवाई आक्रमणमा डेढ सयजनाको ज्यान गएको थियो। राजधानी मोगादिसुको उत्तरी क्षेत्रमा अल-सबाब लडाकु समूहविरुद्ध अमेरिकी सेनाले कारवाही गरेको थियो।
– सन् २०२२- पाकिस्तानी मस्जिदमा आतंकवादी आक्रमण
सन् २०२२ मा आजकै दिन पाकिस्तानको खैबर पख्तुनख्वा प्रान्तस्थित मस्जिदमा भएको आतंकवादी आक्रमणमा ६१ जनाको ज्यान गएको थियो। इस्लामिक स्टेट नामक आतंकवादी संगठनले उक्त आक्रमणको जिम्मा लिएको थियो।
– सन् २०२५- १५ लाख वर्ष पुरानो हड्डीको हतियार
सन् २०२५ मा मानिसले १५ लाख वर्षअघि प्रयोग गर्ने हड्डीको हतियार फेला परेको थियो। तान्जानियाको ओल्डुभाई गर्जमा त्यस्ता हतियारको भण्डार नै फेला परेको थियो।