काठमाडौं- आज २७ फेब्रुअरी। विश्व इतिहासका अनगिन्ति घटनाले स्थान विशेषमा आजको दिन स्मरण गराउँछन्। प्रस्तुत छ, केही प्रमुख घटनाको सारसंक्षेप।
– सन् १९३२- न्युट्रोनको आविष्कार
बेलायती भौतिक शास्त्री जेम्स चाडविकले आजकै दिन न्युट्रोनको आविष्कार गरेका थिए। सोही योगदानका कारण उनलाई पछि नोबेल पुरस्कारबाट सम्मान गरिएको थियो।
– सन् १९३३- जर्मनीको संसदमा आगजनी
सन् १९३३ मा आजकै दिन जर्मनीको संसद भवनमा आगजनी भएको थियो। नाजीहरूले विरोधीहरू माथि आफ्नो दमनलाई जायज ठहर्याउने निहित राजनीतिक उद्देश्यले उक्त आगजनी गराइएको अनुसन्धानमा खुलेको थियो। जर्मनीमा क्रुर नाजी शासन स्थापित गराउन उक्त घटनाले मद्दत पुर्याएको मानिन्छ।
– सन् २००२- गुजरातमा हिन्दू धर्मावलम्बी चढेको रेलमा आगजनी
भारतको गुजरातमा आजकै दिन हिन्दू धर्मावलम्बीहरू सवार रेलमा मुस्लिम अतिवादीहरूले आगजनी गरेका थिए। सावरमती एक्सप्रेसमा अयोध्याबाट फर्किरहेका उनीहरू मुस्लिम अतिवादीहरूको आक्रमणमा परेका थिए। गुजरातको गोद्रा स्टेसन नजिक उक्त घटना भएको थियो। त्यसपछि गुजरातमा धार्मिक दंगा भड्किएको थियो। मारिने ५९ जनामध्ये अधिकांश महिला र बालबालिका थिए।
– सन् २०१०- चिलीमा विनाशकारी भूकम्प
दक्षिण अमेरिकी मुलुक चिलीमा आजकै दिन ८.८ रेक्टर स्केलको विनाशकारी भूकम्प गएको थियो। ठूलो भूकम्प भइकन पनि कम हताहती भएको मानिन्छ। र, ५२५ जनाले त्यसमा परी ज्यान गुमाएका थिए भने हजारौं घाइते भएका थिए। विश्वकै ठूलोमध्येको एक भूकम्प हो त्यो।
– सन् २०१९- संसारकै सानो शिशुको जन्म
जापानको राजधानी टोकियोस्थित अस्पतालमा आजकै दिन संसारकै सानो शिशुको जन्म भएको थियो। ती शिशुको तौल जन्मिँदा २६८ ग्राम मात्र थियो। अस्पतालले उनलाई आजकै दिन घर लैजान उनका माता-पितालाई अनुमति दिएको थियो।
– सन् २०१९- ट्रम्प-किम शिखर वार्ता
सन् २०१९ मा आजकै दिन तत्कालीन अमेरिकी राष्ट्रपति डोनाल्ड ट्रम्प र उत्तर कोरियाका नेता किम जोङ-उनबीच शिखर वार्ता भएको थियो। शिखर वार्ताका लागि दुवै नेता भियतनामको राजधानी हनोई पुगेका थिए।
– सन् २०२२- युक्रेनमाथि आक्रमणको विरोधमा रुसमाथि एकपछि अर्को प्रतिबन्ध
युक्रेनमाथि अत्याचारपूर्ण आक्रमण गरेको रुसमाथि आजकै दिन विभिन्न मुलुकले एकपछि अर्को प्रतिबन्ध घोषणा गरेका थिए। युरोपियन युनियनले रुसी जहाजलाई आफ्ना सदस्य मुलुकहरूको हवाई क्षेत्रमा प्रवेश गर्न प्रतिबन्ध लगाएको थियो। रुसी बैंकहरू संसारभरको स्विफ्ट सिस्टमबाट विच्छेद भएका थिए। र, स्विडेनले युक्रेनको सहायताका लागि हतियार पठाएको थियो।
युक्रेनमाथि रुसको आक्रमणका कारण युरोपमा गम्भीर मानवीय संकट उत्पन्न भएको घोषणा ईयूले गरेको थियो। युक्रेनका १ करोड ८० लाख मानिसले देश छाडेका थिए। र, तीमध्ये ४० लाख शरणार्थी बनेका थिए। युक्रेनमाथि रुसको आक्रमण अद्यापि जारी छ।
– सन् २०२४- ह्वेलको समलैंगिक जोडी फेला
सन् २०२४ मा वैज्ञानिकहरूले ह्वेल माछाको समलिंगी जोडी फेला परेको बताएका थिए। हम्पब्याक ह्वेलहरू बीचको उक्त मैथुनबारेको रिपोर्ट ‘मरिन म्यामल साइन्स’ नामक जर्नलमा प्रकाशित भएको थियो।