काठमाडौं- निर्वाचनका लागि भर्ना गरिएका निर्वाचन प्रहरी अहिले ट्राफिक व्यवस्थापनमा समेत खटिन थालेका छन्। राजधानीको ठमेल क्षेत्रदेखि देशका विभिन्न स्थानमा उनीहरू रातबिरात सिठी बजाउँदै सवारी साधन व्यवस्थापनमा सक्रिय देखिन्छन्।
निर्वाचन सुरक्षाका लागि अस्थायी रूपमा नियुक्त गरिएका कतिपय प्रहरी कर्मचारीले भने यसप्रति असन्तुष्टि जनाएका छन्। “निर्वाचनपछि आफैलाई ट्राफिकले लखेट्ने त होला,” भन्दै केहीले गुनासो पोखेका छन्। उनीहरूका अनुसार सुरक्षाको जिम्मेवारीसहित ट्राफिक व्यवस्थापनको कामसमेत थपिँदा दबाब बढेको छ।
महिला निर्वाचन प्रहरीमाथि भने झन् चुनौती थपिएको बताइन्छ। कतिपयले ‘एक महिनाको जागिर हो नानी, किन ट्यारट्यार गर्छौ’ जस्ता टिप्पणी गर्ने गरेको उनीहरूको गुनासो छ। यस्तो व्यवहारले मनोबल कमजोर बनाएको उनीहरू बताउँछन्।
सडक व्यवस्थापन जस्तो संवेदनशील काममा खटिँदा अस्थायी प्रहरीको भूमिका महत्वपूर्ण भए पनि उनीहरूको सुरक्षात्मक र मानवीय पक्षलाई समेत ध्यान दिनुपर्ने आवाज उठ्न थालेको छ।
