कैलाली। आसन्न प्रतिनिधि सभा सदस्य निर्वाचनलाई लक्षित गर्दै सशस्त्र प्रहरी बल नेपालले सीमा क्षेत्रमा निगरानी कडा बनाएको छ। सोही क्रममा सशस्त्र प्रहरी बल नेपाल प्रधान कार्यालय, सीमा सुरक्षा विभागका प्रमुख अतिरिक्त महानिरीक्षक बंशी राज दाहालले बिहिबार कञ्चनपुरको गड्डाचौकी र कैलालीको त्रिनगर नाकाको स्थलगत अनुगमन गरेका छन्।
अनुगमनका क्रममा एआईजी दाहालले सीमा सुरक्षा तथा राजश्व चुहावट नियन्त्रणमा खटिएका सशस्त्र प्रहरी कर्मचारीलाई त्रुटिरहित तवरले कार्यसम्पादन गर्न निर्देशन दिएका छन्। उनले सरोकारवाला निकायसँग निरन्तर समन्वय, सूचनाको प्रभावकारी संकलन तथा विश्लेषण गरी सोहीअनुसार सुरक्षा व्यवस्थापन सुदृढ गर्न जोड दिएका छन्।
दाहालले कञ्चनपुर र कैलालीका प्रमुख जिल्ला अधिकारी तथा जिल्ला सुरक्षा समितिका पदाधिकारीहरूसँग छलफल गर्दै निर्वाचन अवधिभर उच्च सतर्कता अपनाउन, कुनै पनि अप्रिय घटना हुन नदिन सक्रिय र समन्वयात्मक ढंगले कार्य गर्न निर्देशन दिएका छन्। निर्वाचन सुरक्षा संवेदनशील विषय भएकाले जिम्मेवारी निर्वाह गर्दा व्यवसायिकता, अनुशासन र निष्पक्षता कायम राख्न उनले विशेष जोड दिएका छन्।
छलफलका क्रममा कञ्चनपुरका प्रमुख जिल्ला अधिकारी मदन कोइराला र कैलालीका प्रमुख जिल्ला अधिकारी हिरालाल रेग्मीले निर्वाचन सुरक्षाको तयारीबारे जानकारी गराएका थिए।
यसैबीच, सशस्त्र प्रहरी बल नेपाल बैद्यनाथ बाहिनी मुख्यालय अत्तरिया, कैलालीका निमित्त बाहिनीपति बरिष्ठ उपरीक्षक दिग विजय सुबेदीले समेत इकाइ प्रमुखहरूलाई निर्देशन दिँदै निर्वाचन सुरक्षा, सीमा सुरक्षा तथा राजश्व चुहावट नियन्त्रणमा कडाइका साथ कार्य गर्न आग्रह गरेका छन्। उनले चोरी–तस्करी नियन्त्रणमा शून्य सहनशीलता नीति अपनाउन र सबै निकायसँग समन्वय गर्दै प्रभावकारी
ढंगले परिचालन हुन निर्देशन दिएका छन्।
स्थलगत अनुगमनमा कैलालीका गणपति खुम केसी र कञ्चनपुरका गणपति प्रेम सिग्देलको पनि उपस्थिति रहेको थियो।