जिम्बाबे ‘ए’लाई ६ विकेटले पराजित गर्दै नेपालले एक दिवसीय क्रिकेटको उपाधि जितेको छ। कुशल भुर्तेल र दीपेन्द्रसिंह ऐरीको उत्कृष्ट ब्याटिङका साथ जिम्बावे ‘ए’माथि नेपालले ६ विकेटको जित हात पारेको हो।
त्रिवि क्रिकेट मैदानमा सोमबार सम्पन्न शृंखलाको अन्तिम खेलमा नेपालले टस जितेर फिल्डिङ रोजेको थियो। ३३ ओभरको खेलमा जिम्बावे ‘ए’ ले ३२.१ ओभरमा सबै विकेट गुमाएर नेपाललाई २१४ रनको लक्ष्य दिएको थियो। जवाफी ब्याटिङमा नेपालले ३०.१ ओभरमा ४ विकेट गुमाएर लक्ष्य चुमेको थियो।
नेपालका लागि कुशलले सर्वाधिक ८४ रनको उत्कृष्ट इनिङ खेले। उनले ६१ बलमा ७ चौका र ४ छक्का प्रहार गरे। कुशलले आउट हुनुअघि पहिलो विकेटका लागि आसिफ शेखसँग ७३ रनको साझेदारी गरे। दोस्रो विकेटका लागि सुनिल धमलासँग ३७ रनको साझेदारी गरे।
दीपेन्द्रले ४३ बलमा ४ चौका र तीन छक्कासहित ६० रन बनाए। उनले अविजित इनिङ खेले। आसिफ शेख २९ रनमा आउट हुँदा विनोद भण्डारी २८ रनमा अविजित रहे।
