काठमाडौं– देशभर पालिका चुनावको रौनकबीच उम्मेदवारहरूले आ-आफ्ना घोषणा पत्र सार्वजनिक गर्ने क्रम पनि तीव्र छ। डडेलधुराको भागेश्वर गाउँपालिकामा स्वतन्त्र हैसियतमा अध्यक्षका प्रत्यासी खडक ठकुराठीले पनि आफ्नो घोषणा पत्र सार्वजनिक गरेका छन्। उनी इन्जिनियर पनि हुन्।

उनको आठबुँदे घोषणा पत्रमा दुई वर्षभित्र भागेश्वर गाउँपालिकाका जनताको आधारभूत आवश्यकता पूर्ति गरी आवश्यक संरचना बनाई नगरपालिका घोषणा गर्ने उल्लेख छ। यस्तै, उनले गैरीबगडदेखि परशुराम नगरपालिकासम्म महाकाली नदीमा चार वर्षमा सुक्खा बन्दरगाह निर्माण गरी नेपाली झण्डाबाहक पानीजहाज चलाउने उनको उदघोष छ।

यस्तै, जनतालाई सुख, समृद्धि र शान्तिको पूर्ण प्रत्याभूति दिलाई आनन्दित वातावरणमा ३६५ दिन नै दशैं मनाउने वातावरण मिलाइने उनले उल्लेख गरेका छन्। ‘कृषिलाई महत्त्वपूर्ण प्राथमिकतामा राखी भागेश्वर गाउँपालिकाको खेतीयोग्य जमिनमा मौसमअनुसार हेलिकोप्टरबाट बीउ छर्ने र हेलिकोप्टरबाटै सिँचाइको व्यवस्था मिलाइने छ,’ घोषणा पत्रमा भनिएको छ, ‘जनताको स्वास्थ्यप्रति प्रतिबद्ध रही पशुपालन तथा कृषिमा टेवा पु¥याउने उद्देश्यले गाईं, भैंसी र बाख्राहरूलाई समेत अस्पतालमा सुत्केरी हुने व्यवस्था गराइने छ।’

स्थानीय टप्वाको डाँडादेखि भागेश्वर मन्दिरसम्म भक्तजनलाई लक्षित गरी केबलकार निर्माण गर्नेदेखि बेरोजगार युवालाई भत्ताको व्यवस्था गर्ने प्रतिबद्धता पनि उनले गरेका छन्।