नरसिंह व्यञ्जनकार (८१ वर्ष) ललितपुर महानगरपालिकामा चिरपरिचित अनुहार हुन्। उनी ०२९ सालदेखि आफ्नो वडामा निरन्तर वडाध्यक्ष छन्। उनको वडा अहिले ललितपुर महानगरपालिकाको वडा नम्बर १० बनेको छ। र, यसपालि पनि उनले स्वतन्त्र हैसियतमा उम्मेदवारी दर्ता गराएका छन्।
व्यञ्जनकारले अहिलेसम्म कुनै चुनाव हारेका छैनन्। पहिलोपटक उनी तत्कालीन ललितपुर नगरपालिका–१ का उम्मेदवार बनेका थिए र जिते पनि।
२०३४ सालको गाउँ पञ्चायत चुनावमा पनि उनले वडाध्यक्ष जिते। ०३९ सालको चुनावमा त उनी निर्विरोध निर्वाचित भए। तर, नगरपालिकाको भवन निर्माणबारे तत्कालीन प्रधानपञ्चसँग विवाद भएपछि पदबाट राजीनामा दिएका थिए।
तर, ०४१ सालमा भएको उपचुनाव र ०४३ सालको चुनावमा फेरि वडाध्यक्षमा निर्विरोध निर्वाचित भए। ०४९ सालको चुनावमा पनि कांग्रेसबाट उम्मेदवार बने र निर्विरोध निर्वाचित भए। ०५४ सालको स्थानीय निकाय निर्वाचनमा मात्र होइन, शाही शासनकालमा गरिएको चुनावमा पनि उनी निर्विरोध भए।
२०७४ सालको पालिका चुनावमा पनि उनले कांग्रेसका उम्मेदवारलाई मात्र ९७ भोटले हराए। गणतन्त्र स्थापनायता उनी कुनै दलमा आबद्ध छैनन्। त्यसैले स्वतन्त्र हैसियतमा उम्मेदवार बनेका छन्, गणतन्त्रपछिको दोस्रो पालिका चुनावमा पनि।
