युक्रेनको बुचा शहरमा रुसी सेनाद्वारा भएको नरसंहार छानविन गर्न रुसकै धातु कम्पनीले अपील गरेको छ।
रुसको धातु कम्पनीले रुसलले विज्ञप्तिमार्फत उक्त नरसंहार छानविन गर्न आग्रह गरेको हो। युक्रेनको राजधानी किभको बाह्य इलाका अवस्थित बुचा शहरमा रुसीले सेनाले तीन सयभन्दा बढी निहत्था सर्वसाधारणको बर्बरतापूर्ण हत्या गरेको थियो।
रुसलका अध्यक्ष बर्नार्ड जोनेभेल्डले उक्त घटना जोकोहीका लागि स्तब्ध पार्ने भएको विज्ञप्तिमा उल्लेख गरेका छन्। ‘यो अपराध मिहिन ढंगले छानविन हुनुपर्छ,’ उनले भनेका छन्, ‘हामी तथ्यहरू संकलन गर्न सहयोग गर्छौँ। यस्तो नरसंहार गराउने अपराधीलाई कडा दण्ड दिइनुपर्छ।’
उनको विज्ञप्तिमा उक्त नरसंहारमा कसको हात छ भन्ने प्रष्ट्याइएको छैन। उनले भनेका छन्, ‘यो घटनाले युक्रेन युद्धलाई अझ बढी पीडादायी बनाएको छ। हामी यो द्वन्द्व तत्काल अन्त्य होस् भन्ने चाहन्छौँ। र, नरसंहारमा संलग्नहरू माथि कडा कारवाही माग गछौँ।’
रुसका अधिकांश कम्पनीहरू युक्रेन युद्धबारे मौन रहँदै आएका छन्। बुचा नरसंहारका तथ्य बाहिरिएपछि पहिलोपटक रुसलले मुख खोलेको हो। रुसल रुसको धातुसम्बन्धी काम गर्ने ठूलोमध्येको उद्योग हो।