काठमाडौँ । त्रिदेशीय टी २० श्रृङ्खलाको पहिलो खेलमा नेपालले पपुवा न्यूगिनी (पीएनजी)लाई १८४ रनको लक्ष्य दिएको छ ।
त्रिवि मैदान कीर्तिपुरमा टस हारेर ब्याटिङ गरेको नेपालले २० ओभर खेल्दै नौ विकेट गुमाएर १८३ रन बनाएको हो ।
ओपनर कुशल भुर्तेलले इनिङ्सको पहिलो बलमै छक्का प्रहार गर्दै नेपाललाई आक्रमक सुरुवात दिलाएका थिए । तर, तेस्रो ओभरमा कुशल रन आउट भए । कुशलले ११ बल खेल्दै ३ चौका र एक छक्का मद्दतमा २० रन बनाए ।
त्यसपछि अर्का ओपनर आसिफ शेख र रोहित कुमार पौडेलले दोस्रो विकेटका लागि ८० रनको साझेदारी गरे । १२ औँ ओभरमा आसिफ आउट भएपछि नेपालले लगातार विकेट गुमाएको थियो ।
आसिफले ३५ बल खेल्दै ५ चौका र एक छक्का प्रहार गर्दै ४३ रन बनाए । यस्तै, रोहित २६ बल खेल्दै २ चौका र एक छक्का मद्दतमा ३४ रन बनाए । त्यसपछि दीपेन्द्र सिंह ऐरी ४, कुशल मल्ल ११ र लोकेश बम ५ रनमा आउट भएका थिए ।
१६ औँ ओभरमा करण केसीले ७ बलमा १४ रन बनाएर आउट भए । १९ औँ ओभरमा सोमपाल कामी १ रन बनाएर आउट भए । अन्तिम ओभरको पाँचौ बलमा आरिफ शेख ३२ रन बनाएर आउट भए । उनले २२ बल खेल्दै ३ चौका र २ छक्का हानेका थिए ।
