रुसले युक्रेनमाथि आक्रमण शुरु गरेको २४ औं दिन भइसकेको छ। युद्धका कारण दुवैतर्फ ठूलो हताहती भएको छ। युक्रेन युद्धको रणभूमिमा बदलिएको छ। पछिल्लो समय दुई मुलुकबीच वार्तालाई घनिभूत बनाउने प्रयास भइरहेको छ। यस अवसरमा युक्रेनी राष्ट्रपतिले वार्तामा ढिलाइ गर्न नहुने भन्दै एक भिडियो सन्देश सार्वजनिक गरेका छन्।
युक्रेनी राष्ट्रपति भोलोदिमिर जेलेन्स्कीले शनिबार जारी गरेको सो भिडियो सन्देशमा वार्तामा बसेर निकास दिनको लागि रुसको लागि अहिले अन्तिम अवसर रहेको बताएका छन्।
भिडियो सन्देशमा जेलेन्स्कीले भनेका छन्, ‘रुसको गल्तीबाट हुने क्षतिलाई कम गर्ने अहिले एक मात्र मौका हो। अहिले भेटघाटको समय हो, अहिले वार्ताको समय हो, अहिले युक्रेनको क्षेत्रीय अखण्डता र न्याय पुनःस्थापित गर्ने समय हो, अन्यथा रुसको धेरै पुस्ताले पनि पूर्ति गर्न नसक्ने क्षति बेहोर्नु पर्नेछ ।’
भिडियो सम्बोधनमा जेलेन्स्कीले रुसले क्रिमियामाथि कब्जा गरेको आठौं वर्षगाँठ मनाउन आयोजित मस्कोमा भएको विशाल र्यालीबारे पनि चर्चा गरेका छन्। ¥यालीलाई रुसी राष्ट्रपति भ्लादिमिर पुटिनले सम्बोधन गरेका थिए।
‘आज, रुसले क्रिमिया कब्जा गरेको वार्षिकोत्सवमा मस्कोमा ठूलो जुलुस भएछ। र्यालीमा करिब दुई लाख मानिस सहभागी भएको बताइएको छ । युक्रेनमा भएको आक्रमणमा करिब त्यति नै संख्यामा रुसी सैनिक संलग्न थिए। मस्को स्टेडियममा १४ हजार शव र हजारौं घाइतेहरू छन् भन्ने कल्पना गर्नुहोस्। यो आक्रमणमा अहिलेसम्म नै धेरै रुसी मारिएका छन्,’ उनले भनेका छन् ।
२४ फेब्रुअरीमा युक्रेनमाथि रुसले आक्रमण दिनदेखि शनिबारसम्म करिब १४ हजार रुसी सैनिक मारिएको युक्रेनको सरकारले दाबी गरेको छ। युक्रेनी दाबीलाई पछिल्लो समय पश्चिमी सरकारले पनि समर्थन दिइरहेका छन्। मस्कोले भने ४९८ रूसी सैनिकहरू मात्र मरेका दाबी गरेको छ। देशभित्र असन्तोष फैलिन नदिने रणनीतिअनुसार मस्कोले आफूतर्फ भएको क्षति घटाएर बताइरहेको पश्चिमी शक्तिले आरोप लगाइरहेका छन्।